بعد كام يوم وبعد انتهاء اليوم الدراسي
قررت سالي تعزم الشلة كلها على ايس كريم عشان تشكرهم على اللي عملوه معاها .. وهم
ماشيين في الشارع كان فيه شاب معاه الكلب بتاعه وماكانش رابطه .. وشكله كده كان
بيحب الايس كريم وحب علا كمان من اول نظرة .. الكلب جري ناحيتها ونط عشان ياكل
الايس كريم .. علا وقعت على ضهرها وهي عمالة تضحك والكلب فوقها وبياكل الايس كريم
.. وصاحب الكلب جري وراه .. وكل ده وطبعا عماد ما صدق وفضل يضحك ويصورها بالموبايل
.. صاحب الكلب شده وفضل يعتذر .. والبنات قوموها .. علا هدومها اتبهدلت .. تراب
وايس كريم وطين .. وقررت انها هتروح
(حوار بالانجليزي)
صاحب الكلب: انا اسف جدا .. تحبي اوصلك
للبيت؟
علا: لا لا مفيش داعي .. انا هروح لوحدي
صاحب الكلب: ياريت ما تكونيش زعلانة
علا (وهي بتطبطب على الكلب): لا خالص ..
بالعكس ... الكلب بتاعك كيوت قوي .. عن اذنكم يا جماعة .. انا همشي عشان انتوا
شايفين المنظر
راهول: هتروحي لوحدك كده؟ .. استني هاجي
اروح معاكي
راهول وعلا مشيوا .. عماد وأنور وسالي
بصوا لبعض وابتسموا ابتسامة خبيثة جدا
**
بعد ما الناس كلها روحت كله دخل اوضته
عشان ينام ..
علا: عملتوا ايه بعد مانا مشيت؟
سالي: عادي .. كملنا سنكحة في الشارع ..
خدي
علا: تشيز كيك .. الله
**
وفي نفس الوقت في اوضة الولاد
(حوار بالانجليزي):
أنور: عملت ايه؟
راهول: في ايه؟
عماد: مش انت جيت مع علا؟ اتكلمت معاها في
حاجة؟
راهول: ولا عرفت أتكلم معاها خالص
أنور وعماد: بجد؟
راهول: بصراحة انا مش عارف أقول لها ايه
عماد خبط بايده على قورته من الغيظ
أنور (وهو بيضحك): انت عمرك ما كلمت بنت
قبل كده؟
راهول: مرة
أنور: وعملت ايه؟
راهول: انا كنت صغير ساعتها
عماد: يعني عملت ايه؟
راهول: قلت لها تعالي نشرب شاي
عماد: طب ما ده كويس .. خلاص اعزمها على
أي حاجة
راهول: مش عارف بقا
عماد (وهو بيزعق ومنفعل): مش عارف ايه بس؟
**
تاني يوم بعد اول محاضرة .. راهول واميلي
خرجوا من الفصل عشان يروحوا الفصل اللي فيه المحاضرة اللي بعدها .. أنور وعماد
استنوا شوية
(حوار بالانجليزي)
أنور: هو انت كنت متعصب على راهول امبارح
ليه؟
عماد: أنا؟ لا خالص
أنور: ده انت كان ناقص تضربه
عماد: عايز الصراحة؟
أنور: ها؟
عماد: انا عايز اخلص من علا
أنور: ليه؟
عماد: كان فيه بيننا حاجة كده زمان من
حوالي سنتين وخلصت .. ودلوقتي بتجري ورايا ومزهقاني
أنور (بصوت عالي): ايه؟
عماد (وهو بيقفل بق أنور): ششششششش .. بس
.. انا مش عايز حد يعرف
**
في البريك راهول راح يكلم علا عشان يعزمها
على قهوة .. قالت له انها مش فاضية وسابته.. وشدت عماد من ايده ومشيو .. سالي كانت
واقفة لوحدها قبل ما علا وعماد يمشوا وجريت على راهول .. وأنور كان واقف مع تاتلي
سابها وجري على راهول هو كمان
(حوار بالانجليزي)
أنور: ها؟ عملت ايه؟
راهول: زي مانتوا شايفين كده .. ولا حاجة
.. سابتني ومشيت
وسالي تضحك .. مش بتبطل ضحك
راهول (بعصبية): بتضحكي على ايه؟
سالي (وهي بتحاول تكتم الضحكة): خلاص مش
هضحك
أنور: يعني مفيش امل؟ .. سالي .. هي
صاحبتك .. واكيد انتي عارفاه دماغها
سالي: بصراحة انا ساعات مش بفهمها
وفجأة تاتلي دخلت في النص
تاتلي: هو فيه ايه؟
راهول: ولا حاجة
**
في نفس الوقت عماد وعلا راحوا مكان بعيد
شوية
عماد: نعم .. خير؟
علا: احكي لي حصل ايه امبارح بعد ما مشينا
عماد: عادي .. لفينا شوية وروحنا
السوبرماركت ورجعنا .. فيه ايه؟
علا: يعني ما اتكلمتش في حاجة انت وسالي؟
عماد: هو فيه ايه؟ كل شوية تسأليني عن
سالي؟ انتي عايزة ايه بالظبط؟
علا: عايزة نرجع لبعض
عماد: اعتقد الموضوع ده اتقفل من زمان ..
واتفقنا من ساعتها اننا أصحاب وبس
علا: يعني انت هترجع لها؟
عماد: والله ده ما يخصكيش في حاجة .. عن
اذنك
علا: استنى بس ..
عماد سابها ومشي
علا (في نفسها): ماشي يا عماد
**
في الويك اند وبعد أسبوع طويل الشلة كلها
خرجت .. واميلي اقترحت عليهم يخرجوا يسهروا في ديسكو .. عماد مارضيش لانه كان معاه
شغل وكان عايز يخلصه ..
لما الشلة وصلت الديسكو بالصدفة قابلوا
الولد اللي كان معاه الكلب اللي وقع علا في الأرض
(حوار بالانجليزي)
صاحب الكلب: هاي ..
اميلي: هاي .. ازيك؟ .. انت بتعمل ايه
هنا؟
صاحب الكلب: حبيت اجرب أماكن السهر هنا ..
على فكرة انا اسمي جاك
اميلي: انا اميلي .. دي علا اللي كلبك
وقعها .. سالي .. راهول .. أنور .. تاتلي
جاك: انا عازمكم النهاردة على حسابي ..
عشان المرة اللي فاتت انا مالحقتش اعتذر لعلا
علا (وهي مبتسمة): اعتذار مقبول
جاك: تحبوا تشربوا ايه؟ انا هطلب مارتيني
سالي: معلش انا مش بشرب الكحول .. ممكن أي
عصير
علا: انا كمان هاخد عصير
راهول: وانا كمان هاخد عصير
أنور بقا ساب الحوار ده كله
أنور (بالتركي): ترقصي؟
تاتلي (بالتركي): لا مش عايزة
أنور اتضايق جدا وقام رقص مع اميلي
علا كانت واقفة مش مركزة مع حد خالص ..
كانت مركزة مع المزيكا .. ووقفت بعيد شوية عن راهول وسالي
(حوار بالانجليزي)
سالي: ما تطلب من علا ترقص معاك
راهول: بصراحة ماليش نفس
سالي: طب خلاص ترقص معايا؟
فجأة قاطعتهم اميلي
اميلي: انا عايزة نمرة جاك ومش عارفة
اطلبها منه ازاي؟
راهول: اتقلي شوية
سالي: انتي تعرفي عنه حاجة؟ اتكلمتوا
يعني؟
اميلي: لسة .. مش عارفة افتح كلام معاه
ازاي
سالي: طب تعالي
سالي واميلي وراهول قعدوا مع جاك وندهوا
على علا وتاتلي وأنور عشان يقعدوا معاهم
سالي: قول لي بقا .. انت بتشتغل ايه؟
جاك: انا واصحابي عندنا مزرعة لتربية
الكلاب والقطط .. وانتوا؟
اميلي: احنا كلنا مترجمين
جاك: وانتوا منين بقا؟
اميلي: انا من هنا من تكساس .. سالي وعلا
من مصر .. راهول من الهند .. تاتلي وأنور من تركيا
جاك: انتوا مع بعض؟
أنور: احنا مخطوبين
جاك: بجد؟ مبروك
أنور: وانت منين؟
جاك: انا أصلا من نيويورك .. وجيت هنا عشان
اشوف كام كلب في المأوى واخدهم معايا المزرعة في ألاباما
سالي: واو .. بجد واو
أنور: انا بحب الكلاب جدا .. وبصراحة نفسي
أربي واحد في البيت
تاتلي (بالتركي): بعينك
سالي فهمت طبعا وحست بإحراج عشان خاطر
أنور وبصت في الأرض
جاك: تحبوا تيجوا معايا وانا بختار
الكلاب؟
اميلي: احنا هنبقا مش فاضيين .. عندنا
مذاكرة كتير
سالي بصت لها وهي فاتحة عينها من المفاجأة
.. وراهول قعد يضحك لحد ما شرق .. سالي مسكت اميلي واستأذنت عشان تدخل الحمام ..
وهم في الحمام
سالي: انتي مجنونة؟ الراجل طلب نخرج معاه
.. وانتي تقولي لا؟ وبعدين انا كمان عايزة اخرج
اميلي: انا مش عارفة ايه اللي بيحصل لي
ده؟ انا عمري ما كنت متلخبطة كده مع أي ولد
سالي: خلاص معلش .. هنتصرف
**
في نفس اللحظة وباقي الناس قاعدين بره علا
كانت عمالة تتصل بعماد وهو مش بيرد .. وده خلاها عصبية جدا ..
راهول (بصوت واطي): مالك؟ فيه حاجة
مضايقاكي؟
علا (بصوت واطي): لا مفيش
وعلى غير عادتها طبطبت على دراعه .. وهو
نفسه ما بقاش مصدق .. وفجأة وصلت رسالة على الواتساب للمجموعة كلها
سالي: "احنا هنروح مع جاك .. وبما ان
المفروض ان عندنا مذاكرة .. يبقا كان عندنا امتحان وعرفنا حالا انه اتأجل .. حد
يتكلم في الموضوع ده دلوقتي قدام جاك .. ويقول لنا لما نوصل"
طبعا كلهم فهموا هيعملوا ايه .. طبعا ما
عدا عماد اللي بعت لهم عشان يفهم فيه ايه .. وراهول بعت له
راهول: "هنفهمك على كل حاجة لما
نرجع"
علا طبعا شافت ده واتجننت اكتر .. وتاتلي
طبعا مش عاجبها الكلام كالعادة .. وفي اللحظة دي سالي واميلي رجعوا للترابيزة ..
وراهول بدأ يتكلم وبراءة الأطفال في عينينه
راهول: انتوا عرفتوا ان الامتحان اتأجل؟
وصل ايميل حالا من مستر/ فورد بيقول انه اجل الامتحان للأسبوع اللي بعد
سالي: كويس .. بتهيأ كده يا اميلي نقدر
نروح مع جاك
اميلي: اوك.. مفيش مانع
جاك: خلاص نتقابل الويكاند الجاية ..
وياريت كمان تقولوا لصاحبكم اللي كان معاكم من كام يوم .. ممكن تليفونك يا اميلي
عشان اتفق معاكي نتقابل امتى وفين؟
اميلي (بارتباك): اه .. اكيد
**
اول ما المجموعة كلها روحت السكن عماد حب
يفهم اللي حصل وأنور وراهول حكوا له كل حاجة .. عماد بدأ يضحك
(حوار بالانجليزي)
عماد: طبعا تاتلي مش هترضى تروح .. هي
أساسا مش بتحب الكلاب
أنور: هي ما بتحبش حاجة خالص .. انا
بصراحة بدأت ازهق منها
عماد: وانت عملت ايه مع علا؟
راهول: هي اتكلمت مع حد أصلا؟ .. دي طول
الخروجة ماسكة الموبايل
أنور: هي كانت بتكلم مين ولا بتعمل ايه كل
ده؟
راهول: بصراحة مش عارف
**
في نفس اللحظة تاتلي واميلي كانوا بغيروا
هدومهم عشان يناموا
(حوار بالانجليزي)
اميلي: انا بجد مش مصدقة .. يعني انا كنت
عايزة نمرة جاك .. وهو اللي طلبها .. حاجة غريبة
تاتلي: انتي هتروحي معاه المأوى؟
اميلي: اه طبعا .. انتي مش هتروحي ولا
ايه؟
تاتلي: لا .. انا أصلا مش بحب الكلاب
اميلي: بجد؟ .. ازاي؟
تاتلي: مش بحبهم .. عادي يعني .. هي سالي
هتروح معاكم؟
سالي: اكيد .. هي بتحب تروح الأماكن
الجديدة .. وهي بتقول ان عمرها ما شافت مأوى للكلاب
تاتلي ارتبكت للحظة .. ومسكت موبايلها
وبعتت لأنور
(رسالة بالتركي)
تاتلي: "ايه رأيك نفطر سوا بكرة؟"
**
وفي نفس الوقت كانت علا وسالي بيستعدوا
للنوم
سالي: مالك؟
علا: ماليش
سالي: ماليش ايه؟ انتي ما نطقتيش ولا كلمة
من ساعة ما خرجنا .. انتي لسة زعلانة من جاك من ساعة موقف الكلب؟
علا: لا خالص .. بس كنت مستنية ايميل مهم
سالي: ماشي .. انتي هتيجي معانا مأوى
الكلاب ولا مش ناوية؟
علا: مش عارفة لسة
سالي: ده شكله ايميل مهم جدا اللي مزعلك
كده .. تحبي احكي لك حدوتة؟
علا: ابوس ايدك بلاش حواديتك دي .. انتي
كل مرة تقعدي تحكي حدوتة طويلة عريضة وتعمليني انا البطلة .. وعلا عملت وعلا وسوت
وهوب علا ياكلها الأسد ولا تغطس في البحر ولا أمها تضربها .. انا هنام لوحدي .. بس
بلاش حواديت
سالي (وهي بتضحك): انتي الخسرانة .. تصبحي
على خير
علا: وانتي من اهله
**
في تاني يوم في الويكاند تاتلي صحيت وخبطت
الباب على أوضة الولاد .. وطلبت من أنور ينزل معاها
(حوار بالتركي)
أنور: تحبي نفطر بره النهاردة؟
تاتلي: أي حاجة
وفعلا راحوا مطعم صغير من اللي بيعملوا
وجبات الفطار
أنور: خير .. كنتي عايزاني في ايه؟
تاتلي: انت عايز تروح مع جاك وباقي الشلة؟
أنور: اه طبعا
تاتلي: أنور انت عارف اني مش بحب الكلاب
أنور: خلاص براحتك .. لو مش عايزة تيجي
انا مش هضغط عليكي
تاتلي: واقعد لوحدي؟
أنور: مانتي اللي مش عايزة تيجي
تاتلي: طب ما بلاش تروح ونخرج انا وانت
سوا في أي حتة؟
أنور: طب ما الويكاند يومين .. احنا ممكن
نخرج يوم الأحد
تاتلي: يعني مصمم
أنور: يا حبيبتي ما تجربي وتيجي معانا
..مش يمكن المكان يعجبك؟
تاتلي: ازاي هيعجبني وانا مش بحب الكلاب؟
أنور: عشان خاطري جربي .. مش هتخسري حاجة
**
بعد يومين سالي وعلا كانوا قاعدين
بيذاكروا ..
علا: هو احنا كلنا هنروح مع جاك؟
سالي: انا عن نفسي هروح .. معرفش باقي
الناس هتروح ولا لأ
علا: طب فرضا صفصفت عليكي .. هيبقا شكلك
ايه وانتي مع اميلي وجاك؟
سالي: ماهو طبعا لو صفصفت عليا مش هروح ..
ده اكيد يعني .. بس لو فيه حد كمان خلاص
فجأة خرجت علا من الاوضة
سالي: مالها المجنونة دي؟
**
علا خبطت على اوضة الولاد .. وراهول هو
اللي فتح
(حوار بالانجليزي)
راهول: اهلا .. تعالي
علا: فين عماد؟
راهول: نزل يشتري حاجة .. انت عايزاه؟
علا: له .. لما ييجي قول له لو سمحت
راهول: اوك
**
علا طلب الاسانسير .. ولما وصل كان عماد
فيه
علا: تسمح نتكلم؟
عماد: خير .. عايزة ايه؟
علا: تعالى نطلع السطوح
**
في السطوح حصل الحوار الاتي
علا: انت ما كنتش بترد عليا ليه امبارح؟
عماد: كنت مشغول
علا: طب مانت رديت ع الواتساب
عماد: مانا كنت عايز افهم موضوع الامتحان
ده .. بس راهول وأنور رسوني ع الزتونة
علا: حكوا لك ع المشوار بتاع جاك؟
عماد: اه طبعا
علا: وانت رايح؟
عماد: وانتي مالك أصلا؟
**
بعد يومين كمان سالي كانت في اوضتها ..
والواتساب بتاعها رن
(رسايل بالتركي)
أنور: "انا مش عارف اعمل ايه مع
تاتلي .. شكلي مش هروح معاكم"
سالي: "ليه؟ مالها؟"
أنور: "بتقول ما بتحبش الكلاب"
سالي: "خطيبتك دي غريبة جدا .. لا
بتحب اللعب ولا بتحب الكلاب .. حتى بتخرج معانا بالعافية .. انا بحس انها واحدة
مسنة"
أنور: "والله انا بدأت ازهق من
طريقتها دي .. انا بحبها ونفسي ارضيها .. بس فعلا هي بقت مملة قوي"
سالي: "طب أحاول اقنعها؟"
أنور: "مش عارف"
**
تاني يوم في معاد العشا في مطعم السكن سالي
كانت قاعدة بتاكل هي واميلي .. ولقت أنور وتاتلي دخلوا المطعم هم كمان وقعدوا
معاهم
(حوار بالانجليزي)
سالي: شكلك مبسوطة قوي .. هو جاك كلمك؟
اميلي (وهي مبتسمة): ايوة ..وأكد على معاد
يوم السبت
سالي: كويس .. وانتوا هتروحوا؟
أنور (وهو بيبص لتاتلي): لسة مش عارف
اميلي: ليه يا تاتلي كده؟ ما تيجي
وتنبسطوا معانا
تاتلي (وهي متعصبة): انت حكيت لهم ليه؟
أنور: حكيت لهم .. ايه المشكلة في كده؟
تاتلي (وهي لسة متعصبة): خلاص ابقا روح
لوحدك
وقامت مشيت ... وفي نفس اللحظة دخل راهول
وعماد وشافوا تاتلي وهي خارجة ومتعصبة
راهول: مالها تاتلي؟
أنور: مش عارف هي فجأة اتعصبت كده ليه ..
احنا كنا بنتكلم في موضوع خروجة يوم السبت وهي زعلت
عماد: خلاص مش لازم تروحوا طالما هي
زعلانة كده
أنور: هي اليومين دول بقت عصبية جدا
وبتتخانق على اقل حاجة
راهول: معلش.. اتكلم معاها .. اكيد في
حاجة مضايقاها
سالي: طب وانت يا راهول؟ .. هتروح ولا
ايه؟
راهول: انا عن نفسي عايز اروح
عماد: طب ما تطلب من علا تروح معاك
راهول: مش عارف .. انا أصلا بفكر اصرف نظر
عن الموضوع ده
اميلي: موضوع ايه؟
سالي: اصله معجب بعلا ومش عارف يقول لها
**
في نفس الوقت طلعت تاتلي وخبطت على علا في
اوضتها
(حوار بالانجليزي)
علا: ازيك يا تاتلي؟ .. ادخلي .. مالك؟
تاتلي: انتي هتروحي مشوار يوم السبت ده؟
علا: لسة مش عارفة .. ليه؟
تاتلي: بصراحة كده انا خايفة اروح
علا: خايفة من ايه؟ من الكلاب؟
تاتلي: من سالي
علا (وهي مستغربة جدا): سالي؟؟؟!!!!
تاتلي: بصراحة انا شاكة ان فيه حاجة بينها
وبين أنور
علا (وهي مستغربة جدا): سالي؟؟؟!!!! ..
وانتي جبتي الكلام ده منين؟
تاتلي: طريقة تصرفهم مع بعض .. الكلام
والضحك والخروج وكل حاجة
علا: اكيد انتي غلطانة .. هم ممكن يكون أصحاب
بس
تاتلي: مش عارفة
**
بالليل الواتساب بتاع علا رن
(رسايل بالانجليزي)
راهول: "انتي هتروحي معانا يوم السبت
ولا لأ؟"
علا: "لسة مش عارفة؟ .. هو أنور وعماد
مش رايحين؟"
راهول: "الاتنين شكلهم مش
رايحين"
علا: "اه .. أنور شكله مش رايح بسبب
تاتلي .. طب وعماد مش رايح ليه؟"
راهول: "بصراحة مش عارف"
**
بعد يومين الشلة كلها اتجمعت في اوضة سالي
(حوار بالانجليزي)
اميلي: اخر كلام .. مين رايح ومين مش
رايح؟ .. جاك كلمني من شوية وقال انه هيأجر عربية
علا: انا مش رايحة
راهول (وهو زعلان): انا كمان مش رايح
تاتلي: ولا انا
أنور: انا برضه مش رايح
وخرج ورزع باب الاوضة .. وتاتلي قامت وراه
اميلي: كده مش فاضل غير سالي وعماد ..
هتروحوا ولا لأ؟
سالي: للأسف انا جالي شغل وهسهر عليه ..
فمش هعرف اروح في حتة يوم السبت
عماد: قولي لجاك محدش رايح في حتة
وخرج هو كمان من الاوضة .. ورغم انه كان
زعلان جدا بس ما حبش يبين ده قدامهم .. وخاصة سالي
**
يوم السبت جاك جه بالعربية واخد اميلي ..
وهم بره سألها
جاك: هم اصحابك ما جوش ليه؟
اميلي: اللي اتخانقوا .. واللي عنده شغل
.. واللي مكسل
جاك: بصراحة كده احسن ..انا أصلا كنت عايز
نخرج لوحدنا
اميلي (وهي مبتسمة ومبسوطة): وانا كمان
https://www.facebook.com/Batteekh.Season
https://www.facebook.com/sarahsadek2020
https://www.facebook.com/sarahsadek2020
ليست هناك تعليقات:
إرسال تعليق