بعد حوالي أسبوع الشلة كلها رتبوا حالهم عشان المعسكر .. اللي خلص شغله واللي خلص مذاكرته واللي حضر الشنطة واللي حضر معدات المخيم من أكياس نوم وخيم خلافه .. وراحوا المعسكر..
اول ما وصلوا على طول بدأوا يحضروا الخيم ومولدات الكهرباء والحمام والكاميرات وباقي الحاجة
(حوار بالانجليزي)
روهان: انتوا هتعملوا كليب ولا فوتوشوت؟
رجب: الاتنين
ناتالي: احنا هنعمل جزء صور وجزء فيديو عشان هو ده اللي هنعرضه في الشاشة ورانا في حفلة اخر السنة
روهان: اها
أنور: وانتي اللي هتغني في الحفلة يا سالي؟
سالي: انا هغني اغنيتين بس .. الاغنية التركي اللي انتوا سمعتوها من كام يوم .. وفيه اغنية هندي كمان
روهان: بجد؟
كريستيان: طبعا .. احنا عايزين على قد ما نقدر نغني بكذا لغة عشان نقول ان كلنا واحد
اميلي: انتوا كلكم بتغنوا ولا بتعزفوا بس؟
ناتالي: كلنا بنغني ونعزف .. سالي هي الوحيدة اللي بتغني بس
سالي: والله يا جماعة انا كان نفسي اتعلم الجيتار .. بس ماليش نفس
كايلي: هتتعلمي يعني هتتعلمي
عماد: ده هي بقالها سنين بتقول على موضوع الجيتار ده لكن ولا مرة حاولت
***
بعد حوالي ساعتين بدأ التصوير .. والفرقة استفادت من وجود أصحاب سالي ودخلوهم في التصوير معاهم .. وبعد حوالي 8 ساعات من التصوير المتواصل والبروفات يادوب قعدوا .. كلهم اتلموا حوالين النار يتكلموا ويهزروا ويغنوا واللي ماسك كاميرا وبيصور ... شوية وسالي اخدت بعضها وراحت على خيمتها واخدت كشاف وكتاب وطلعت على حتة عالية شوية جنبهم وقعدت تقرا .. بعد شوية رجب طلع عندها
(حوار بالتركي)
رجب: انتي قومتي ليه؟ فيه حد زعلك؟
سالي: لا ابدا .. بس قلت اقرا شوية .. الكتاب ده عندي بقاله كتير ومش عارفة اتلم عليه
رجب: وريني كده .. الكتاب ده كان عندي في تركيا .. مش فاكر كنت اديته لمين ... بس حلو جدا
سالي: اه فعلا ..
رجب: الظاهر اننا دماغنا متشابهة في حاجات كتير
سالي (وهي بتضحك): ده حقيقي
في اللحظة دي جه عماد
عماد: انتوا بتقروا ايه؟
رجب: طب انا هنزل عشان انام بقا .. تصبحوا على خير
سالي: وانت من اهله
رجب سابهم ونزل تحت تاني
عماد: عايز ايه الواد ده؟
سالي: يعني هيكون عايز ايه؟ كان بيشوفني قمت ليه
عماد: الواد ده مش نازل لي من زور
سالي: حرام عليك .. ده ولد طيب قوي
عماد: خلاص .. روحي حبيه بدالي احسن
سالي (وهي بتضحك): لا ماليش نفس النهاردة .. يمكن بكرة افكر
عماد: والله؟ ... طب تعالي بقا
وراح شايلها على كتفه وجري بيها على جدول المية اللى كان قريب منهم ورماها في المية .. وهم بيلعبوا بالمية سالي حست انها بردت.. عماد اخدها في حضنه وقرروا يرجعوا ع المعسكر ..
في نفس الوقت ده كانت علا واقفة ورا الشجرة بتبص عليهم وعينيها مرغرغة بالدموع .. وفجأة جه راهول من وراها ..
(حوار بالانجليزي)
راهول: بتعملي ايه؟
علا (وهي بتلف وبتسمح دموعها): ولا حاجة
راهول: مالك؟
علا قعدت تعيط وراهول حضنها .. بعد ثانيتين بعدت وطلعت تجري وهي بتعيط وراحت لخيمتها
***
تاني يوم في البريك بتاع التصوير راهول قعد مع عماد وحكى له على اللي حصل لانه كان هيتجنن ويعرف مالها ... عماد فهم انها شافته مع سالي
***
بالليل لما المجموعة كلها اتلموا حوالين النار عشان يتعشوا .. علا سحبت نفسها وقعدت بعيد .. سالي طبعا واخدة بالها ان علا مش طبيعية من الصبح وعينيها ورامة وشكلها معيطة
سالي: مالك؟
علا: مفيش يا سالي .. اصلي جالي كابوس بالليل ومضايقني
سالي (وهي بتطبطب عليها وبتمسح على شعرها): بعد الشر عليكي يا حبي .. فكي بقا
***
بعد يومين المجموعة كلها رجعت الجامعة والسكن .. من اول يوم الفرقة اتجمعت في البريك عشان يظبطوا المونتاج بتاع التصوير .. وبعد ما خلصوا رجب قال لها انه عايز يكلمها على انفراد
(حوار بالتركي)
سالي: اكيد فيه مصيبة انا عاملاها في الفيديوهات
رجب (وهو بيضحك): لا بالعكس .. انتي عاملة شغل هايل .. وصوتك كمان جميل وانا بحبه
سالي: الحمد لله
رجب: ايه رأيك نتعشى سوا؟
سالي: ماشي .. ممكن نتقابل في المطعم بتاع السكن واحنا كلنا بنتعشى ..
رجب (وهو بيقاطعها): انا اقصد لوحدنا
سالي: ليه؟
رجب: اكيد عايز أتكلم معاكي يعني
سالي: انت قلقتني على فكرة
رجب: بصراحة انا معجب بيكي .. وكان نفسي أقول لك من ساعة ما كنا في المعسكر .. بس ما كانش فيه فرصة
سالي: انا مش عارفة أقول لك ايه .. بس انا اسفة .. مش هينفع
رجب: فيه حد تاني؟
سالي: لا ابدا .. بس انت عارف احنا مشغولين في المذاكرة والشغل وزاد عليهم الفرقة .. فالواحد مالوش وقت يعطس .. انا مش بفكر في الموضوع ده دلوقتي خالص .. انا بجد اسفة
رجب (وهو زعلان): ولا يهمك .. انا اللي اسف
***
بعد اليوم الدراسي ما خلص ومع انتهاء اخر محاضرة .. روني زميل سالي في نفس القسم قال لسالي انه عايز يتكلم معاها
(حوار بالانجليزي)
روني: ينفع نتغدى مع بعض بكرة او بعده؟
سالي: انا مش عارفة بصراحة ظروفي ايه .. غالبا هيبقا عندي شغل مع الفرقة
روني: مش شرط في البريك يعني .. ممكن بعد المحاضرات
سالي: هو فيه ايه؟
روني: انا معجب بيكي من اول يوم في الدراسة وكان نفسي أقول لك
سالي (فتحت بوقها وبرأت): ...
روني: انا عمري ما تخيلت اني ابقا معجب بواحدة من دين تاني او من بلد تانية .. بس هو ده اللي انا حاسس بيه
سالي: صدقني ما ينفعش .. زي مانت قلت .. انا مسلمة .. يعني يوم ما ارتبط المفروض ادور على مسلم زيي ..
روني: على فكرة انا ممكن اغير ديني عادي
سالي: وكمان انا فيه حد في حياتي
روني: ايه؟
سالي: ايوة .. وبحبه جدا .. وأتمنى انك تلاقي واحدة مناسبة ليك وتحبوا بعض
***
اما روحوا السكن وكل واحد رجع على اوضته .. سالي كانت اعصابها تعبانة من اللي حصل .. وعايزة تتكلم مع علا
سالي: تخيلي اللي حصل النهاردة
علا: خير
سالي: رجب وروني .. قال الاتنين واقعين في دباديبي .. يخرب بيت كده
علا: الاتنين بيحبوكي؟
سالي: وحبكت الاتنين يتكلموا في النفس اليوم
علا: طب نقول ماشي على رجب .. لكن روني؟ .. ايه الهبل ده؟
سالي: اه والله هبل .. انا نفسي اخلص ام الماجستير ده بقا عشان العك ده كتر قوي .. ده احنا في مية البطيخ .. ده النهاردة كان ناقص الحيطان كمان تقول لي بحبك .. خلاص كل البنات ماتت وانا اللي نجيت؟
علا (وهي بتضحك): ودي حاجة تزعل؟
سالي: انتي عارفة انا أصلا بتوتر من المواقف دي
شوية وأنور كان بعت رسالة على الواتساب
(رسالة بالتركي)
أنور: "لو سمحتي قابليني ع السطوح"
سالي اتعصبت اكتر
سالي: عايز ايه ده كمان؟
علا: ما تروحي شوفي عايز ايه؟
وفعلا سالي لبست الجاكت وطلعت له
(حوار بالتركي)
سالي: ايه مالك؟
أنور: متضايق شوية
سالي: لسة حوار تاتلي ده؟
أنور: بصراحة انا مش عارف اعمل ايه .. اكمل معاها ولا اسيبها؟
سالي: انت كنت بتحبها؟
أنور: اه
سالي: ودلوقتي؟
أنور: دلوقتي فيه واحدة تانية شاغلة دماغي .. ونفسي أقول لها بس مش عارف
***
بعد حوالي ربع ساعة سالي رجعت اوضتها وهي مبلمة
علا: فيه ايه؟ انتي كنتي كويسة
سالي: أنور بيحبني
علا (وهي مخضوضة ومتفاجئة): ايه؟
سالي (وهي بتعيط وبترتعش): اعمل ايه انا دلوقتي؟
***
تاني يوم بعد اليوم الدراسي علا استغلت ان اميلي خلاص ما بقتش موجودة في الاوضة .. وراحت لتاتلي قعدت معاها عشان تقول لها على حاجة .. وهي خارجة قابلت روهان ونزلوا يتمشوا
https://www.facebook.com/Batteekh.Season
https://www.facebook.com/sarahsadek2020
https://www.facebook.com/sarahsadek2020
