#موسم_البطيخ "الحلقة الأخيرة"

تاني يوم والد اميلي اتوفى .. والجنازة طبعا كانت في الكنيسة .. اميلي ووالدتها طبعا كانوا منهارين .. الشلة كلها لانهم كانوا مسلمين قعدوا ورا .. الوحيدة اللي صممت تقعد قدام مع اميلي ووالدتها هي سالي ... وكانت هي وجاك بيطبطبوا عليهم ويواسوهم ..

**

بعد الجنازة ما خلصت كلهم راحوا البيت عشان العزا .. سالي ما فارقتش اميلي ولا والدتها لحظة واحدة .. وكان فيه تلاتة مراقبين الوقف كويس قوي .. طبعا انتوا عرفتوهم .. عماد وأنور وعلا ..

عماد وأنور كانوا بيبصوا لسالي باعجاب شديد جدا بانها طيبة وحنينة وجدعة .. لكن علا كانت بتبص لأنور وعماد وهي هتموت من الغيظ والغل ..

**

بعد كام ساعة .. والدة اميلي طلعت اوضتها ونامت .. وسالي هي اللي طلعت معاها وغطتها وطفت النور ونزلت .. واميلي كانت قاعدة تحت بتعيط وجاك بيطبطب عليها ويحضنها ويواسيها ..

عماد: نامت؟

سالي: اه .. نامت من كتر العياط ياعيني

عماد: ربنا يكون في عونها بصراحة

راهول جري على سالي عشان يتطمن

(حوار بالانجليزي)

راهول: هي عاملة ايه دلوقتي؟ انتوا بقالكم ساعة ونص فوق .. هي كويسة؟

سالي: ياعيني ما كانتش عايزة تدخل الاوضة .. وانهارت على الباب وقعدت تعيط .. فضلت قاعدة معاها على الأرض لحد ما قدرت تقف ودخلتها ونيمتها بالعافية

سالي خرجت الجنينة ولقت أنور قاعد

(حوار بالتركي)

أنور: انا مش قادر استوعب اللي حصل ده

سالي: هنعمل ايه؟ هي الدنيا كده

أنور: واحنا هنعمل ايه؟

سالي: مش عارفة .. انا رأيي نفضل هنا لحد اخر الاجازة .. ولو انتوا مش عايزين تقعدوا .. انا هقعد .. انا مش هسيب اميلي وطنط في ظرف زي ده

وفي لحظة سالي دموعها نزلت .. ماقدرتش تحوشها اكتر من كده .. أنور طبطب عليها وخدها في حضنه .. ولأنها كانت زعلانة جدا ما ادركتش ان الحضن ده ما ينفعش الا بعد شوية وقت .. وفعلا زقت أنور وطلعت جري على اوضة اميلي

وقت ما حصل الحضن ده .. علا في ثانية ندهت على عماد عشان يبص من ازاز الباب ويشوف اللي بيحصل

**

في الاوضة .. سالي وقفت تبص من الشباك على أنور وهي هتتجنن .. فجأة باب الاوضة خبط .. كان عماد

عماد: ممكن اعرف ايه اللي حصل ده؟

سالي: ايه اللي حصل؟

عماد: اللي حصل تحت في الجنينة من شوية

سالي: ارجوك ما تفهمش غلط .. انت شايف انا حالتي عاملة ازاي

عماد: سالي .. انا اخدت بالي كويس انك زقيتيه .. يعني ما كنتيش عايزة يحصل .. وانا واثق فيكي .. ممكن تفهميني فيه ايه؟

سالي: أنور بقاله فترة بيحبني .. وانا ما كنتش عايزة أقول لك عشان ما تزعلش منه .. وعشان كنت خايفة تاتلي تعرف وتزعل منه هي كمان

عماد: المفروض كنتي تقولي لي .. على الأقل كنا نفكر سوا بدل مانتي بتفكري لوحدك

سالي: على فكرة بجد مش وقته خالص .. انت مش عارف انا نفسيتي عاملة ازاي

**

تاني يوم الشلة كلها صحيوا بدري عشان يحضروا الفطار .. وجاك طلع صحى اميلي ووالدتها عشان ينزلوا يفطروا .. وشكلهم كان باين ان حالتهم اتحسنت شوية

***

بعد حوالي يومين .. وقبل الغدا بشوية .. أنور خرج الجنينة عشان يشم شوية هوا .. واميلي ووالدتها كانوا فوق .. عماد وراهول كانوا في اوضة الغسيل بيغسلوا هدومهم .. ودخلت لهم علا

(حوار بالانجليزي)

سالي: راهول حبيبي .. ممكن تسيبنا انا وعماد نتكلم كلمتين؟

راهول: حاضر يا حبيبتي

وباس خدها وخرج

عماد: عايزة ايه؟

علا: انت هتسكت لانور؟

عماد: ايه يا سخان؟ مالك؟ عايزة ايه؟

علا: انا عايزة اعرف انت ساكت له ليه؟

عماد: لما نرجع السكن هبقا اتصرف معاه .. اطلعي انتي منها بس يا سخان

**

بعد خمس دقايق بالظبط عماد خرج من اوضة الغسيل زي الطلقة على الجنينة وراح ضارب أنور بالبوكس في وشه .. الظاهر ان علا نجحت في انها توقع بينهم .. سالي كانت واقفة في الشباك وشافت اللي حصل .. وطلعت تجري على بره .. جاك كمان كان واقف بيعمل حاجة في المطبخ وخد باله ان فيه حاجة وطلع جري عشان يبعد أنور وعماد عن بعض .. ولحسن الحظ اميلي ووالدتها ما سمعوش حاجة

سالي (وهي بتصرخ بالتركي): حرام عليكم .. انتوا اتجننتوا؟ .. احنا في ايه ولا في ايه؟ .. أنور لو سمحت سيب البيت وامشي حالا .. دلوقتي

أنور جري لم حاجته في دقايق وطلع على محطة الأوتوبيس .. وهو مش عارف هيروح فين

**

بالليل والدة اميلي سألت سالي عن أنور وليه مشي .. سالي قالت لها ان تاتلي تعبت وهو راح يشوفها .. وما رضيتش تحكي لها اللي حصل في بيتها عشان ما تزعلش

**

في نفس الوقت .. في الشقة اللي اجرتها تاتلي .. الباب خبط .. تاتلي فتحت .. كان أنور هو اللي بيخبط .. دخل وقعد يحكي لها على كل اللي حصل من ساعة ما دخلوا بيت اميلي وأهلها ..

(حوار بالتركي)

تاتلي: وانت جاي لي عايز ايه دلوقتي؟ .. مش انت بتحبها؟ .. عايز مني انا ايه؟

أنور: بصراحة انا ما كنتش عارف اروح لمين واحكي له؟ .. لقيتني جاي لك

تاتلي (وهي مش قادرة تبص في عينه): على العموم تقدر تبات على الكنبة لحد ما الاجازة تخلص .. كلها 3 أيام

ودخلت اوضتها وقعدت تعيط جوا .. وأنور كان سامعها ومش قادر حتى يقول لها انه اسف

**

الاجازة خلصت وكلهم رجعوا السكن .. بس أنور نقل لاوضة تانية لوحده .. وفضل الحال على كده لمدة شهر تقريبا .. حتى لما كان يشوف أي حد من الشلة كان يبص في الأرض ويبعد .. الوحيدة اللي كان بيبص لها وساعات كتير من غير ما تاخد بالها ... هي سالي ..

وطول الشهر ده وعلا عمالة تغل على سالي وعماد .. بس برضه بتخرج مع راهول ..

**

وفي مرة لما كان راهول وعلا في الشارع .. عدوا على محل بتاع الماظ .. علا وقفت عند الفاترينة شوية ..

(حوار بالانجليزي)

علا: ايه رأيك في الخاتم ده؟

راهول: حلو جدا وشيك قوي

علا: هو ينفع أقول لك اني عايزاه؟

راهول: بجد؟ يعني انتي وافقتي؟

علا: ايوة

راهول حضنها وشالها وفي ثواني اخدها في المحل عشان يشتروا الخاتم

**

علا لما رجعت الاوضة بالليل كانت سالي صاحية بتشتغل ..

علا: قولي لي مبروك

سالي: خير

علا: انا وراهول اتخطبنا

سالي: بجد؟ مبروك يا حبي

سالي كانت فرحانة جدا واخدتها بالحضن

سالي: قررتوا هتعيشوا فين بقا؟ في الهند ولا في مصر ولا في أمريكا؟

علا: والله لسة ما قررناش .. لما نخلص امتحانات يمكن نعرف

سالي: انا بجد مبسوطة قوي .. ربنا يتمم لك على خير يا قلبي .. على فكرة احنا المفروض نقول لاميلي .. يمكن الخبر ده يفرحها شوية

علا: اكيد

(مكالمة بالانجليزي)

سالي: ألو يا اميلي .. ازيك؟

اميلي: كويسة

سالي: علا عايزة تكلمك وتقول لك على حاجة تفرحك قوي

علا: الو .. انا وراهول اتخطبنا

سالي: مبروك .. خلاص انتوا بكرة تجيبوا تاتلي وتيجوا الشقة عندي ونحتفل سوا

**

تاني يوم البنات اتجمعوا عند اميلي في الشقة وجاك خرج وسابهم عشان يبقوا براحتهم .. اميلي طلعت ازازة شامبانيا عشان تحتفل .. تاتلي قالت انها هتشرب المرة دي .. هي أصلا متعودة بتشرب في المناسبات .. سالي وعلا طلبوا من اميلي عصير .. بس بعد شوية وقت ومزيكا ورقص .. علا قررت انها هتشرب برغم انها عمرها ما جربت الكحول

تاتلي شربت كتير وبدأت تسكر .. بس بدأت تتكلم رغم انها كانت ساكتة من اول السهرة .. ورغم وجود اميلي وعلا .. لكنها اتكلمت بالتركي .. مش بالانجليزي ... لانها كانت عايزة سالي بس هي اللي تفهم

(حوار بالتركي)

تاتلي: انا نفسي اعرف .. انتي فيكي ايه زيادة عني عشان خطيبي يسيبني عشانك؟ .. انتي عايزة ايه تاني؟ .. مش عندك واحد انتي بتحبيه؟ .. ايه؟ عايزاهم كلهم؟ .. انتي حقيرة ..

سالي كانت مذهولة من اللي سمعته ومش قادرة تستوعب .. لكن تاتلي نفسها قطعت الدهشة دي .. لما رجعت كل اللي في بطنها ووقعت في الأرض

البنات شالوها وحطوها ع الكنبة .. وسالي كمان ساعدتها .. بس وهي هتتجنن .. تاتلي عرفت منين؟

**

علا وسالي روحوا السكن .. بس علا قالت لسالي انها هتطلع السطوح .. لما علا طلعت اتصلت بعماد وقالت له يطلع لها

عماد: انتي عايزة ايه دلوقتي؟ انا عندي شغل وعايز اسلمه قبل الفجر .. اخلصي

علا (وهي بتقرب منه): انت لسة بتحب سالي؟

عماد: اه لسة بحبها .. خير؟

علا: انا بقول لك تفكر تاني

عماد: انتي شاربة ولا ايه؟

علا: شوية صغيرين والله .. قلت اجرب عشان احتفل بخطوبتي

عماد: اه .. راهول قال لي

علا: مش هتقول لي مبروك؟

عماد: مبروك .. يا رب تعقلي بقا

علا: حاف كده؟

عماد: اومال اغمسها لك يعني؟

علا: لا .. مبروك تتقال كده

في نفس اللحظة سالي كانت لسة هتدخل السطوح لانها كانت قلقانة على علا لما شافتها كانت بتشرب .. بس بدل ما تطمن عليها لقيتها هي وعماد بيبوسوا بعض .. علا تنتحت للحظة .. بس في ثانية دماغها قالت لها تطلع الموبايل وتصورهم .. الفلاش ضرب في وشهم وخلاهم اخدوا بالهم انها موجودة .. ونزلوا يجروا وراها ع السلم .. لحد ما دخلوا وراها الاوضة

في لحظة عماد اعترف بكل حاجة .. اعترف انه كان على علاقة بعلا أيام ما كانوا مخطوبين .. وان هي اللي كانت بترتب انهم يطلعوا منحة الماجستير سوا .. وبكل اللي كانت بتعمله من اول ما وصلوا لحد دلوقتي

سالي: الكلام ده صح يا علا؟

علا (وهي باصة في الأرض): ايوة

سالي: وانا اللي كنت بخاف عليكي وبحبك اكتر من اختي؟ ده انا كنت مبسوطة لما قلتي لي انك اتخطبتي

سالي في اللحظة دي كانت قوية زي الصخرة ..

سالي: انتوا الاتنين تنسوا انكم تعرفوني أصلا .. واياك اشوف حد منكم في أي حتة ولو بالصدفة .. حتى في الفصول .. والا وديني هفضحكم

**

سالي خرجت من الاوضة وهي مش عارفة تروح فين .. بس لقت نفسها بتخبط على باب اوضة أنور .. وأول ما شافته قعدت تعيط وحكت له على كل اللي حصل ... ومن كتر العياط سالي نامت مكانها ع السرير .. وأنور غطاها ونام في الارض

**

تاني يوم الصبح راهول خبط على باب أنور .. وهو اول ما سمع الباب صحى سالي وخلاها دخلت الحمام لانه مش عايز حد يفهم الموقف غلط ..

(حوار بالانجليزي)

راهول: انا مش فاهم حاجة من اللي حصل .. صحيت الصبح لقيت عماد سايب الاوضة .. ولقيت علا سايبة لي خاتم الخطوبة وباعتة لي رسالة بتقول لي اني مش هشوفها تاني ..

**

بعد يومين سالي قررت تقابل تاتلي واميلي .. وحكت لهم على كل اللي حصل .. تاتلي قررت انهم يفضلوا أصحاب وما يخسروش بعض حتى لو أنور اختارها .. واميلي قررت انها تبات مع سالي في الاوضة .. لان سالي ما سابتهاش لما والدها اتوفى

**

تاني يوم سالي كانت فاتحة باب اوضتها وهي بتذاكر كالعادة .. عماد وقف جنب الباب يبص لها زي ما كان بيعمل .. بس المرة دي سالي ولا بصت له ولا ضحكت ولا شاورت له ولا قالت له تعالى .. المرة دي قامت وقفلت الباب في وشه .. من غير حتى ما تتكلم .. بعد شوية كانت زهقت من المذاكرة وطلعت السطوح .. بعد شوية تاتلي واميلي وراهول وأنور طلعوا .. كانت واقفة وشها للسور وضهرها ليهم .. اميلي ندهت لها .. اول ما دورت وشها شافوا دموعها على خدها .. أول مرة يشوفوا دموعها .. أخدوها في حضنهم وفضلت تعيط بهستريا

**

وعدت الفترة دي وسالي كل ما تشوف عماد تعمل نفسها مش شايفاه وتتجاهله وتمشي .. وهو ولا عارف يفكر ولا عارف يركز

***

بعد ما خلصت الامتحانات.. اتعلمت حفلة التخرج .. وسالي غنت نفس الاغنية اللي غنتها قبل كده Korkak .. ولتاني مرة عماد خرج من المسرح .. بس المرة دي سالي ما خرجتش وراه

**

تاني يوم الكل كان بيحضر نفسه عشان يمشي من السكن ويروح بلده .. خبط باب أوضة سالي .. أنور هو اللي كان بيخبط

(ٍحوار بالتركي):

أنور: عاملة ايه؟

سالي: الحمد لله كويسة .. أيه الاخبار؟

أنور: تمام .. انتي معاد سفرك امتى؟

سالي: بعد 3 أيام .. وانت؟

أنور: بعد 4 أيام .. ينفع نخرج النهاردة؟ ولا وراكي حاجة؟

سالي: اكيد مش ورايا حاجة .. وبيني وبينك انا نفسي اخرج

**

(حوار بالتركي):

أنور: كانت تجربة غريبة جدا السنة دي

سالي: فعلا .. محدش هيرجع بلده زي ما مشي منها .. انت عارف اكتر حد صعبان عليا مين؟

أنور: مين؟

سالي: راهول .. اخد مقلب حياته يا عيني

أنور: تعرفي انك جميلة قوي؟

سالي: ليه؟

أنور: اللي اتعمل فيكي كان اصعب بكتير .. لكن صعبان عليكي راهول

سالي: انا دايما أقول العمل عدو التفكير ..واحنا انشغلنا بالامتحانات .. وانا طلعت كل الطاقة السلبية اللي عندي في المذاكرة

أنور: تتجوزيني؟

سالي (وهي متفاجئة): ايه؟

أنور: تتجوزيني؟

سالي: انا مش عارفة أقول لك ايه

أنور: انا مش عايز رد دلوقتي .. فكري براحتك وقولي لي قرارك

**

بعد 3 أيام كان معاد طيارة سالي .. أنور واميلي وجاك كانوا معاها في المطار .. وراهول وتاتلي كانو مشيوا قبلها بيوم .. سالي سلمت على جاك واميلي .. أنور وقف معاها على جنب

(حوار بالتركي):

أنور: هتوحشيني

سالي: وانت كمان .. انا أساسا مش عارفة هرجع أعيش في بيتنا ازاي؟ .. إحساس غريب قوي

أنور: ممكن اطلب منك طلبين؟

سالي: اطلب

أنور: اننا نفضل أصحاب مهما حصل .. وانك تبلغيني اول ما توصلي لقرار

سالي: حاضر

أنور باس راسها .. ومشيت سالي وركبت الطيارة .. وهي بتفكر يا ترى توافق ولا لأ

==النهاية==

https://www.facebook.com/Batteekh.Season
 https://www.facebook.com/sarahsadek2020