فاضل أسبوعين على امتحانات التيرم الأول
.. والكل نازل مذاكرة .. وتقريبا كل الناس بقت تقضي معظم وقتها في المكتبة ..
ماعدا سالي .. طول عمرها ما تحبش جو المكتبات والهدوء الرهيب بتاعها .. وكانت بتستغل
فرصة ان السكن طول اليوم تقريبا فاضي وكل الشلة كل يوم في المكتبة .. حتى علا كانت
بتقعد في المكتبة طول اليوم .. وده معناه ان الاوضة فاضية لسالي عشان تعمل اللي هي
عايزاه .. فكانت بتشغل مزيكا على اللاب وتسيب باب الاوضة مفتوح..
***
وفي يوم موبايل سالي رن .. كانت رسالة على
الواتساب...
عماد: بتعملي ايه؟
سالي: بعمل شوربة عدس
عماد: يخرب بيت الغلاسة .. بتعملي ايه؟
سالي: يعني هكون بعمل ايه؟ اكيد بذاكر
عماد: طب انا نازل لك
سالي: ماشي
***
سالي كانت فاتحة الباب وقاعدة قصاده
بتذاكر ع اللاب توب كالعادة .. بس عماد وقف شوية جنب الباب يتفرج عليها .. سالي ما
اخدتش بالها منه الا لما قامت عشان تاخد كتاب كان محطوط على السرير عندها .. سالي
اول ما شافته ابتسمت له .. وهو كمان ابتسم
عماد: ادخل؟
سالي: تعالى
سالي اخدت الكتاب ورجعت للمكتب وعماد اخد
الكرسي التاني وحطه جنبها ..
عماد: طول عمرك شكلك حلو وانتي مشغولة
سالي: مانا عارفة .. كل الناس بتقول كده
عماد: ماشي يا رخمة .. على فكرة انا زهقت
من المذاكرة زهق السنين بصراحة .. هموت واخرج
سالي: والله وانا .. انا قرفانة قرف
عماد: على فكرة العيال كانوا بيقولوا
النهاردة على اننا نروح الديسكو كمان يومين او حاجة
سالي (وهي بتبص الناحية التانية): لا ..
بلاش الديسكو
عماد: ليه بلاش؟
سالي: بلاش وخلاص .. مش عايزة اروح
عماد: متهيأ لي انا عرفت ليه
سالي: مانت شطور وبتفهم اهو
عماد: طب عشان خاطري
سالي: اهو عشان خاطرك انت بالذات .. انا
مش رايحة
عماد: خلاص مش مشكلة .. بس مبدأ الخروج
نفسه لسة موجود .. صح؟
سالي: اه طبعا
**
بعد يومين علا كانت بتلبس عشان الخروجة ..
علا: مش هتخرجي معانا؟
سالي: لا مش عايزة
علا: ليه بس؟ .. تعالي فرفشي معانا شوية
سالي: لا .. انا هقعد اعمل أي حاجة
علا: طب خلاص براحتك .. خلي بالك من نفسك
.. باي يا حبي
سالي: سلام .. انبسطي كويس .. وهاتي لي
معاكي حاجة حلوة
بعد ما علا نزلت سالي قفلت الباب وشغلت
مزيكا وقعدت ترقص لوحدها .. بعد شوية الباب خبط .. كان عماد
سالي: ايه ده؟ انت ما نزلتش؟
عماد: مش احنا اتفقنا ان فيه خروجة؟
سالي: انا كنت فاكرة ان كلنا هنخرج يوم
تاني
عماد: لا انا كان قصدي النهاردة ... ياللا
البسي عشان ننزل .. هستناكي تحت
سالي لبست ونزلت لعماد تحت في الجنينة ..
وخرجوا وهم مش عارفين يروحوا فين ..
عماد: تحبي تروحي فين أو تعملي ايه؟
سالي: مش عارفة .. اوعى تكون هتخطفني .. هبلغ
عنك
عماد: يا شيخة اتنيلي
عماد وسالي دخلوا السينما وكانوا بيتفرجوا
على فيلم رعب .. وعلى عكس الناس اللي كانوا بيتفرجوا .. سالي وعماد كانوا كل شوية
يبصوا لبعض ويضحكوا ..
***
في نفس اللحظة كانت الشلة في الديسكو وكان
معاهم جاك... جاك واميلي قاموا رقصوا
(حوار بالانجليزي)
جاك: اومال فين سالي وعماد؟
اميلي: قالوا مش هيخرجوا النهاردة
جاك: تعرفي ان الاتنين لايقين على بعض قوي
.. انا متأكد ان فيه بينهم حاجة
اميلي: محدش فيهم حكى لي .. بس شكلهم باين
قوي
وعلى ترابيزة كانت علا قاعدة جنب راهول:
(حوار بالانجليزي)
راهول: تعرفي انك وحشاني قوي اليومين دول
.. مش عارف أتكلم معاكي خالص من كتر المذاكرة
علا: معلش .. بكرة الامتحانات تخلص وعندنا
اجازة هنخرج وننبسط فيها .. عايزين نشد حيلنا ونجيب تقديرات كويسة
راهول: إن شاء الله يا روحي
راهول مسك ايد علا وباسها .. وقصادهم على نفس
الترابيزة كانت تاتلي قاعدة مع أنور:
(حوار بالتركي)
أنور: امتى بقا نخلص الماجستير عشان نرجع
تركيا ونتجوز؟
تاتلي: خلاص فاضل سنة .. قربنا اهو
أنور: ان شاء الله هنعزم الشلة كلها في
الفرح طبعا
تاتلي: ده اكيد
جاك واميلي رجعوا للترابيزة:
(حوار بالانجليزي)
اميلي: بصوا بقا .. انا عرفت ان الجامعة
هتقفل السكن بتاعنا في اجازة الكريسماس .. وكده كده انا عازمة جاك عندنا في بيت
بابا وماما عشان يقابلهم .. ايه رأيكم ان كلنا نقضي إجازة الكريسماس هناك؟
كلهم وافقوا على الاقتراح ده وكانوا
مبسوطين قوي
***
بعد ما الفيلم خلص عماد وسالي خرجوا واشتروا
ايس كريم
عماد: تعرفي اني فكرت في حاجة؟
سالي: حاجة زي ايه؟
عماد: ... تعالي
***
بعد شوية عماد وسالي دخلوا الجامعة ..
طبعا ما كانش فيه حد هناك .. لكنهم اتسحبوا ودخلوا لحد ما وصلوا ملعب البيسبول ..
سالي: أنا طول عمري اسمع العيال بتزوغ
عشان تهرب من المدرسة .. نقوم احنا نزوغ لجوا المدرسة؟
عماد: ماهو ده الجديد .. تعرفي تلعبي
بيسبول؟
سالي: ولا اعرف
عماد: طب ايه رأيك نجرب؟
سالي: انت بتعرف؟
عماد: يعني .. طشاش .. استني شوية وراجع
لك
عماد جاب مضرب وكور من جنب دكة الاحتياطي
.. وبدأ يعلمها .. وفعلا بدأ يحدف لها الكور وهي تمسك المضرب وتضرب الكور .. مرة
المضرب يقع .. مرة تشوط الكورة بعيد .. مرة تشوطها قريبة .. كرة تخبط في عماد نفسه
ويقع في الأرض .. لحد ما تعبوا هم الاتنين من كتر اللعب .. لكنهم قرروا يناموا على
ضهرهم يتفرجوا على السما والنجوم
سالي: تعرف اللحظة دي بتفكرني بايه؟
عماد: ايه؟
سالي: بتيمون وبمومبة لما كانوا بيتفرجوا
ع النجوم
عماد (وهو بيضحك): وربنا كنت عارف انك
هتقولي كده .. صحيح .. انتي كنتي بتضحكي على ايه في السينما؟
سالي: اصلي افتكرت حاجة
عماد: افتكرتي ايه؟
سالي: لا مش هقول لك
عماد: والنبي تقولي .. افتكرتي ايه؟
سالي: مش هقول لك
عماد: خلاص .. انا كمان مش هقول لك انا افتكرت
ايه
سالي: طب قول انت الأول
عماد: افتكرت مسلسل Friends .. لما ريتشل كانت بتتفرج على فيلم رعب وكانت خايفة
سالي: ...وجوي حضنها وقال انه خايف هو
كمان
عماد: يعني انتي افتكرتي نفس اللقطة في
نفس اللحظة..سبحان الله
وفجأة بدل ما السما كانت صافية والنجوم
واضحة جدا .. الدنيا غيمت وبدأت تمطر .. طبعا عماد وسالي قاموا جري قبل ما هدومهم
تتوسخ من الطين .. ودخلوا على اوضة الملابس بتاعت اللعيبة .. سالي كان شعرها مبلول
ولقت فوطة تنشف بيها شعرها .. بعد ما نشفته .. حطت الفوطة على كتفها ..عماد شافها
وكان مش قادر يشيل عينه من عليها
عماد: اول مرة اشوف شعرك مبلول
سالي: مانا على طول بنشفه بالسيشوار
عماد: بس كده احلى بكتير وهو كيرلي
سالي: تفتكر المطرة دي هتخلص امتى؟
عماد: مش عارف .. ربنا يستر بس ونعرف نروح
سالي: يا رب .. تفتكر العيال دول بيعملوا
ايه؟
عماد: اكيد بيرقصوا
سالي عوجت بقها .. عماد فهم انها متضايقة
.. فطلع موبايله وشغل اغنية هادية هي بتحبها قوي (I will
love you more than that – BSB) ..
وقام ومد ايده لسالي .. هي كمان مسكت ايده وقامت رقصت معاه .. بعد شوية قالت له
سالي: انا بحب الاغنية دي قوي .. بس فيه
اغنية تانية انا بحبها جدا
وخلت عماد وقف الاغنية على موبايله ..
وشغلت هي على موبايلها اغنية دوشة شوية (La
Gozadera) ..وبدأوا يرقصوا مع بعض
ويضحكوا
***
المطرة خلصت في وقت متأخر .. وسالي وعماد
روحوا السكن .. والاتنين دخلوا اوضهم واصحابهم نايمين .. سالي غيرت هدومها وراحت
على سريرها وفتحت موبايلها .. وشغلت مسلسل Friends على نفس الحلقة اللي افتكرتها هي وعماد .. وعماد كمان اول ما دخل
الاوضة قعد على المكتب وشغل نفس الحلقة على اللاب ..
***
تاني يوم الشلة كلها قرروا يذاكروا في
اوضة الولاد:
(حوار بالانجليزي)
اميلي: بصوا .. قبل ما نذاكر .. سالي
وعماد .. ايه رايكم تقضوا الكريمساس في بيت بابا وماما؟ الناس هنا كلهم موافقين ..
وجاك كمان جاي .. قلتوا ايه؟
عماد: اكيد طبعا .. ليه لأ؟
سالي: وانا موافقة
**
الناس فضلت تذاكر لحد ما الوقت اتأخر ..
سالي كانت جعانة نوم عشان سهرت اليوم اللي قبلها .. فنامت مكانها على الكتاب وهي
قاعدة على سرير راهول وعماد على عكسها كان في قمة النشاط وقادر يواصل..
(حوار بالانجليزي)
ايملي: الحقوا .. سالي نامت
أنور: طب ينفع حد مننا يشيلها يوديها
لاوضتها؟
علا: لا مش هينفع ... دي ممكن تصحى وهتفضل
صاحية ومصدعة كده لحد بكرة بالليل .. انا رأيي نسيبها ونخرج من الاوضة .. حتى نقعد
في اوضة تاتلي واميلي
اميلي: طبعا .. تعالوا
وفعلا راهول غطاها وكلهم خرجوا وطفوا
النور .. بس عماد قال لهم انه نسي كشكول ورجع الاوضة تاني .. بس الحقيقة انه كان
ناسي حاجة تانية .. لانه اول ما دخل باس راس سالي وهي نايمة وخرج
***
الصبح طلع .. وسالي صحيت ولقت راهول وأنور نايمين
على سرير أنور جنب بعض .. وعماد نايم في سريره .. سالي قعدت جنبه على السرير وباست
راسه وخرجت بره الاوضة .. وعماد دور وشه اول ما هي قفلت الباب لانه كان صحي لما حس
بيها
https://www.facebook.com/Batteekh.Season
https://www.facebook.com/sarahsadek2020
