بعد كام يوم في الفجر سالي صحيت على كابوس
وحش جدا .. لدرجة فضلت تعيط لحد الصبح لكن علا كانت نايمة ومش حاسة بيها .. لما الصبح
طلع ومعاد صحيانهم جه علا صحيتها وكانت مستغربة قوي لان كل يوم سالي هي اللي بتصحى
قبلها وتصحيها .. بس الحقيقة ان سالي ما كانتش نايمة بس كانت مدورة وشها الناحية
التانية ولما علا صحيتها قالت لها انها عايزة تنام ومش هتنزل دلوقتي .. وفعلا علا
سابتها ونزلت بس وهي قلقانة .. وأول ما علا خرجت وقفلت الباب سالي فضلت تعيط زي
المجنونة
الشلة كلها اتقابلوا في مطعم السكن
كالعادة .. بس لما كلهم لقوا علا داخلة عليهم لوحدها اتخضوا .. ولما سألوها قالت
لهم انها مش عارفة سالي مالها ويمكن هي عايزة تنام شوية
***
خلصت المحاضرة الأولى والتانية وبدأت
البريك .. يادوب ساعتها سالي دخلت الكافيتريا عشان عارفة ان أصحابها هيبقوا هناك
.. كانت اول مرة يشوفوها لابسة نضارة شمس .. وخطواتها بطيئة زي ما تكون تعبانة ..
وشفايفها وخدودها كمان وارمين جدا .. اول ما قعدت معاهم قلعت النضارة عشان يشوفوا
منظر خلاهم كلهم اتخضوا ..
عينيها كانت كاسات دم وورامة جدا وشها كله
وارم ولونه مخطوف .. اول ما علا شافتها كده جريت قعدت جنبها واخدتها في حضنها
علا: مالك يا بنتي؟ .. فيكي ايه؟
سالي: كابوس
علا: بابا برضه؟
وبدأت سالي تعيط تاني وبحرقة قوي وعلا
حاضناها ... عماد كان قاعد جنبها وبدأ يطبطب على كتفها ويقرأ قرآن
(حوار بالانجليزي)
اميلي: سالي مالها؟
علا: اصلها شافت كابوس
في اللحظة دي تاتلي تنحت .. كانت سالي
صعبانة عليها قوي .. وعملت تصرف ما كانش متوقع خالص .. ندهت على أنور وخدته بره
الكافيتريا ..
(حوار بالتركي)
تاتلي: ايه رأيك نعمل حاجة لسالي عشان نفك
عنها شوية؟
أنور: زي ايه مثلا؟
تاتلي: نعمل عيد خطوبتنا
أنور: بس ده لسة في الكريسماس
تاتلي: وماله؟ .. نحتفل النهاردة كلنا ..
ونحتفل في الكريسماس انا وانت بس
أنور: ايه ده؟ .. انتي مين؟ .. انتي
متأكدة انك تاتلي؟
تاتلي (وهي بتضحك): ليه يعني؟
أنور: اصلك مش بتحبي الحفلات
تاتلي: عشان البنت زعلانة قوي .. خلينا
نفرحها شوية
أنور: طب انا عندي فكرة ... انا هخليها هي
وعماد يروحوا يشتروا تورتة سوا
تاتلي: ليه عماد يعني؟
أنور: هقول لك بعدين
أنور دخل الكافيتريا ونده على عماد وخده
وخرجوا لتاتلي.. وحكوا له على حوار الحفلة
(حوار بالانجليزي)
أنور: ها؟ .. ايه رايك؟
عماد: مش عارف .. ممكن ناخد معانا ايميلي
او راهول
تاتلي: خدوا اللي تاخدوه .. المهم تخرجوها
وتشغلوها
عماد: انتي طيبة قوي يا تاتلي .. شكرا
تاتلي: بس اسمع .. اوعى تقول لها اني
عارفة .. قول لها ان انور عاملها لي مفاجأة
**
اليوم الدراسي خلص .. وسالي لسة وشها وارم
وعينيها دبلانة ومش بتكلم حد .. أنور وتاتلي قالوا انهم هيروحوا السكن .. عماد وراهول
وعلا وايميلي خدوا سالي وخرجوا وهي لسة مش بتتكلم .. وراحوا فعلا محل حلويات ..
اول ما عماد دخل المحل وقبل ما يشوف الكيك والتورتات لقا في المنيو المحطوطة بره
ميلك شيك فراولة .. وهو عارف ان سالي بتحبه .. فقرر يطلب لهم كلهم منه .. وفعلا
اخدوا ترابيزة وعماد طلب الميلك شيك لحد ما يلفوا التورتة ويطلعوها ..
(حوار بالانجليزي)
علا: اتفضلي .. عماد جاب لك الميلك شيك
اللي بتحبيه
سالي (وعلى وشها ابتسامة باهتة): شكرا يا
عماد
اميلي: ياللا اضحكي بقا .. ده احنا رايحين
نحتفل
راهول: هتضحكي ولا اعيط انا؟
سالي: حاضر
علا (بعد ما لفت دراعها حوالين سالي): وهو
لو عيط انا كمان هعيط .. ينفع كده؟
**
بعد ما الشلة خلصت قعدتها في المحل وخرجوا
ومعاهم التورتة .. راحوا السوبرماركت يشتروا حاجة ساقعة .. راهول وتاتلي اخدوا
سالي جوا السوبر ماركت وسابوا عماد وعلا بره
(حوار بالانجليزي)
راهول: أقول لكم على خبر هيفرحك قوي؟
اميلي: ايه؟
راهول: انا خرجت قلت لعلا اني معجب بيها أخيرا
اميلي: بجد؟ امتى وازاي وفين؟
راهول: من كام يوم كلمتني واتقابلنا في
السطوح .. وقالت لي انها معجبة بيا
سالي: مبروك
وفي نفس الوقت بره
عماد: هي سالي مالها؟ كل ده من كابوس؟
علا: هي ساعات بيحصل لها كده .. وخاصة لما
تحلم بباباها .. بتفضل طول اليوم تعبانة كده .. حتى بعد ما اتوفى
عماد: يااااه! .. دي عمرها ما قالت لي على
حاجة زي كده
علا: خليك جنبها الكام يوم دول .. هي لما
بتبقا كده بتبقا محتاجة حد يطبطب عليها ويكون جنبها
عماد: غريبة قوي
علا: ايه اللي غريبة؟
عماد: معقول انتي بتحبيها قوي كده؟
علا: اكيد طبعا
عماد: اومال كنتي واقفة بيني وبينها ليه؟
علا: ارجوك بلاش كلام في الموضوع ده ..
انا دلوقتي مرتبطة براهول ونسيت كل حاجة .. كل اللي فاكراه ان سالي صاحبتي واني
بحبها جدا ..
عماد: اه .. راهول قال لي .. الف مبروك
***
الشلة كلها روحوا وعملوا الحفلة في السطوح
.. وكانوا مبسوطين جدا .. حتى سالي بدأت تضحك .. حتى فيه ولدين وبنت من زمايلها في
السكن قعدوا معاهم .. وخلوا سالي ترقص معاهم .. في اللحظة دي كان عماد بيتفرج
عليها ومبسوط قوي وأنور وقف جنبه
(حوار بالانجليزي)
أنور: ايه؟ مالك ساكت ليه؟
(الحوار اتقلب تركي)
عماد: سالي وحشتني قوي .. قوي
أنور (وهو متفاجيء): انت بتتكلم تركي؟
عماد: اه
أنور: يعني انت يومها فهمتني وانا بقول
لسالي..؟
عماد: ارجوك ما تقولهاش .. انا عارف انكم أصحاب
وبتحكوا لبعض على كل حاجة
أنور: حاضر
**
بعد الحفلة كل الناس نزلت اوضها وأنور وتاتلي
فضلوا قاعدين في السطوح
(حوار بالتركي)
أنور: كل سنة وانتي طيبة
تاتلي: انت صدقت؟
أنور: بتخيل .. هو الخيال ممنوع؟
تاتلي: بهزر معاك .. وانت طيب
أنور: بس ايه التغيير المفاجئ ده؟ اول مرة
تبقي عايزة تعملي حفلة يعني
تاتلي: بصراحة سالي صعبت عليا قوي ..
وبعدين انا بقالي فترة واخدة بالي جدا من نظرات عماد ليها .. انا متأكدة انه
بيحبها
أنور: فعلا .. هو حكى لي انه بيحبها جدا
**
تاني يوم سالي بقت كويسة .. وصحيت كالعادة
بدري وصحت علا ونزلوا ع المطعم .. عماد اول ما شافها انبسط قوي انها بقت كويسة
لدرجة انه جري ناحيتها اول ما دخلت ..
عماد: ايوة كده .. انتي كانت حالتك صعبة
قوي امبارح
سالي: الحمد لله انا بقيت احسن
عماد: تعالي ياللا افطري
***
في البريك عماد اخد سالي وخرجوا من
الجامعة واشتروا سندوتشات من بره وقعدوا على مقعد في جنينة قريبة..
عماد: ايه يابنتي اللي حصل امبارح؟ كل ده
من كابوس؟
سالي: اصله كان كابوس صعب قوي .. انا
ساعات بيحصل لي كده
عماد: علا قالت لي ..
عماد حط السندوتش بتاعه جنبه ع المقعد ..
وضم سالي وباس راسها .. في اللحظة دي سالي ما عرفتش تمسك نفسها واتفتحت في العياط
عماد: خلاص بقا .. انتي هتعيطي تاني ليه
بس؟ .. اديكي بليتي التيشرت .. والجو برد خلقة
سالي سابته ورجعت لورا وضحكت في وسط
دموعها زي الأطفال
عماد: هو انا جايبك هنا عشان تعيطي؟ .. لو
ما سكتيش هاخد السندوتش بتاعك
سالي (وهي بتمسح دموعها): لا خلاص هسكت
اهو
عماد: اعوذ بالله .. حتى وانتي بتعيطي همك
على بطنك؟ .. أقول لك على سر؟
سالي: سر ايه؟
عماد: انتي عارفة ان تاتلي هي صاحة فكرة
حفلة امبارح؟
سالي: طبيعي .. مش عيد خطوبتها؟
عماد: لا مش عيد خطوبتها .. ده عيد
خطوبتها في الكريسماس .. وهي اللي قالت لنا نعمل الحفلة عشانك
سالي: بجد؟
عماد: واضح انها بتحبك قوي .. كانت زعلانة
عليكي جدا .. بس اوعي تقولي لها اني قلت لك .. احسن هتقتلني
سالي: يبقا هقول لها عشان نخلص
عماد: طب مفيش سندوتش
عماد خطف السندوتش وجري وسالي طلعت تجري
وراه
https://www.facebook.com/sarahsadek2020
https://www.facebook.com/BatteekhSeason
https://www.facebook.com/BatteekhSeason
ليست هناك تعليقات:
إرسال تعليق