#موسم_البطيخ الحلقة 1

سالي بنت مصرية .. عمرها 27 سنة .. مترجمة حرة .. وهي بنت مجتهدة جدا .. قدمت عشان تاخد منحة لدراسة الماجستير وفعلا اخدتها .. وسافرت هي وصاحبتها علا اللي اخدت نفس المنحة معاها .. وهناك في الجامعة في أمريكا حصل الاتي.

***

طبعا اول ما البنات وصلوا السكن بدأوا يرتبوا حالهم ودواليبهم .. وهم بيرتبوا حاجتهم وهم فاتحين الباب دخلت لهم اميلي

(حوار بالانجليزي):

اميلي: هاي .. انا اميلي زميلتكم في الجامعة وبعمل ماجستير في الفنون ومسؤولة عن السكن هنا .. اهلا بيكم

سالي: اهلا بيكي .. انا سالي ودي علا .. وبنعمل ماجستير في الترجمة

علا: هاي

اميلي: احنا عاملين كمان يومين حفلة بداية السنة الدراسية عشان كل الطلبة يتعرفوا على بعض وعلى المدرسين .. اكيد لازم تيجوا

علا: اكيد طبعا

سلمي: تمام جدا

اميلي: على فكرة الحفلة هتبقا الساعة 6 .. هي حفلة كاجوال وهننبسط فيها جدا هنرقص ونغني ونلعب ..

علا: كويس .. عشان احنا مش بنحب جو الفساتين والخنقة دي

سالي: فعلا

اميلي: انا كمان على فكرة .. خلاص مستنياكم هناك .. على فكرة انا اوضتي في الدور اللي فوق .. تقدروا تيجي في أي وقت

علا: طبعا

اميلي: اسيبكم بقا تكملوا توضيب اوضتكم .. باي

***

بعد ما البنتين خلصوا قرروا ينزلوا ياكلوا في المطعم بتاعة السكن .. قعدوا على ترابيزة كبيرة .. وفيه ولدين جم يقعدوا جنبهم (أنور وراهول)

أنور (بالانجليزي): ازيكم انا أنور من تركيا وده راهول من الهند .. وبنعمل ماجستير في الترجمة هنا

سالي (بالتركي): بجد؟ .. انت تركي؟

أنور (بالتركي): انتي تتكلمي تركي؟

سالي (بالتركي): اه .. انا بذاكره من على الانترنت ..

علا اتخضت لانها اول مرة تعرف ان سالي بتتكلم تركي .. وقطعت كلامهم

علا (بالانجليزي): على فكرة احنا كمان بندرس ترجمة .. بس احنا في قسم عربي اسباني .. وانتوا؟

راهول (بالانجليزي): احنا في قسم عربي إيطالي .. انتوا منين؟

سالي (بالانجليزي): انا سالي ودي علا .. احنا من مصر

أنور (بالانجليزي): ايه رايكم بكرة الصبح نتقابل ونعرفكم على باقي اصحابنا ونفرجكم على الجامعة؟

سالي (بالانجليزي): اكيد

**

تاني يوم الصبح سالي وأنور وعلا وراهول راحوا الجامعة مع بعض .. سالي كانت مبسوطة قوي انها لقت حد تتكلم معاه تركي وتتعلم منه ... فطول السكة ماشية جنب أنور وعمالة ترغي معاه .. ووراهم علا وراهول .. وبرغم ان علا شخصية اجتماعية جدا زي سالي وبتحب الناس .. لكنها ما كانتش هاضمة راهول ده خالص وخاصة انه شخص خجول شوية وقليل الكلام رغم انه بيحاول يتغلب على مشكلته دي

لما وصلوا الجامعة الموجودة على بعد 10 دقايق مشي من السكن عشان يقابلوا باقي الشلة كانت المفاجأة اللي خضت علا وسالي .. وبالذات سالي

***

المفاجأة كانت عماد اللي سالي كانت بتحبه من 3 سنين .. وعلا كمان اتخضت لانها كانت عارفة الموضوع من اوله وخاصة انها تعرف عماد من الأول .. الغريب ان سالي رغم انها كانت متفاجئة جدا ومن جواها كانت حاسة انها هتطب ساكته لكنها كانت بتتصرف بأعصاب حديد على غير عادتها لانها طول عمرها لما بتتفاجيء بتتلخبط وما بتعرفش تتصرف

عماد: ازيكم؟.. انتوا بتعملوا ايه هنا؟

علا: احنا في ترجمة عربي اسباني

عماد: انا في عربي إيطالي

علا: انت مع أنور وراهول .. عشان كده اتعرفوا عليك

عماد: فعلا .. ازيك يا سالي؟ .. عاملة ايه؟

سالي: الحمد لله تمام .. انت ايه اخبارك؟ .. انت هنا من امتى؟

عماد: انا هنا من 4 أيام

سالي: كويس

وجه أنور بدوشته وهو بيقول لهم

(حوار بالانجليزي):

أنور: انتوا تعرفوا بعض ولا ايه؟

عماد: من زمان جدا

أنور: طب تعالوا اعرفكم على باقي زمايلنا

***

لما البنات روحوا بالليل بدأوا يتكلموا

علا: انا لحد دلوقتي مش مصدقة ان عماد هنا .. هتعملي ايه في الحوار ده؟

سالي (بدون أي رد فعل): هعمل ايه يعني؟

علا: مش عارفة .. انا اللي بسألك .. يعني .. بعد اللي حصل زمان وكده

سالي: الحوارات دي خلصت من زمان جدا .. ومالوش لازمة دلوقتي نتكلم فيها .. نامي بقا وبطلي رغي عشان ورانا يوم طويل بكرة

****

تاني يوم الناس كلها في الجامعة صحيت على قرار اتعلق في كل حتة في الجامعة وفي السكن "ممنوع ارتداء الحجاب في الحرم الجامعي" .. لما سالي عرفت الحكاية دي قررت انها هتقلع الحجاب .. وفعلا رجعت اوضتها ووضبت شعرها ونزلت مع علا ..

**

لما راحوا المطعم كان عماد قاعد لوحده بيفطر .. بس لما شاف سالي بشعرها تنح .. علا راحت تجيب اكل ليها ولسالي .. وسالي قعدت جنب عماد ..

عماد: على فكرة شعرك حلو قوي .. دي اول مرة اشوفه

سالي: البركة في القرار اللي نزل النهاردة

عماد سكت وما عرفش يرد عليها .. وبعدها بثواني جت اميلي قعدت معاهم

(حوار بالانجليزي)

اميلي: صباح الخير .. واو .. شعرك حلو قوي .. ما تبقيش تغطيه تاني

سالي: شكرا .. بس انا فعلا مضطرة ما اغطيهوش تاني .. انا عايزة اسألك على حاجة .. هو فيه كوافير قريب من هنا؟

اميلي: اه فيه .. تحبي نروح سوا؟

سالي: طبعا .. احنا هننبسط قوي

راهول دخل المطعم وقعد مع باقي الشلة

(حوار بالانجليزي)

راهول: صباح الخير

عماد: اومال فين أنور؟ انا صحيت الصبح ما لقيتهوش

طبعا عماد قال كده لان هو وأنور وراهول قاعدين مع بعض في نفس الاوضة

راهول: راح يجيب خطيبته من المطار .. ماهي طالبة معانا

اميلي: بجد؟ هي اسمها ايه .. احتمال أكون شوفت اسمها في الكشف

راهول: اسمها تاتلي

**

بالليل كانوا البنات بيجهزوا للحفلة بعد ما رجعوا من الكوافير

علا: تصدقي ان شعرك حلو قوي كده؟

سالي: انا أصلا بحب الشعر الجرسون جدا .. بس كان بقالي فترة ما قصتهوش .. على فكرة عايزين نتعرف على خطيبة أنور

علا: يا ريت والله

**

في الحفلة سالي كانت مبسوطة قوي واتعرفت على ناس كتير جدا .. وتقريبا ما قعدتش في حتة فضلت تتنطط وترقص .. لحد ما أنور وخطيبته دخلو جنينة السكن اللي الحفلة كانت معمولة فيها .. سالي اول ما شافتهم راحت ناحيتهم عشان تسلم عليهم

(حوار بالتركي)

أنور: اعرفك على خطيبتي

سالي: انتي اكيد تاتلي .. انا سالي

تاتلي: اهلا .. ازيك؟

سالي: تعالي اعرفك على باقي اصحابنا

سالي خطفت تاتلي وجريت ناحية علا واميلي عشان تعرفهم عليها .. وعماد وراهول وقفوا مع أنور

(حوار بالانجليزي)

راهول: هي سالي فين؟

أنور: اهي هناك مع اميلي وتاتلي وعلا

عماد (في نفسه): هي سالي قصت شعرها كده ليه؟

**

بعد شوية الحفلة بدأت تهيص اكتر والرقص اشتغل اكتر وكمان الشرب زاد .. وسالي رغم انها كانت مبسوطة .. بس بدأت تضايق من حوار الشرب ده وقررت انها تطلع تتفرج من فوق السطوح ... وأول ما طلعت فوجئت بعماد واقف هناك

سالي: انت بتعمل ايه هنا؟

عماد: انتي عارفة اني ماليش في الجو ده .. وانتي بتعملي ايه هنا؟ ده انا كنت شايفك مبسوطة وبترقصي وخارباها

سالي: ما عجبنيش الشرب بقا والقرف ده .. العيال اتجننوا اول ما المدرسين مشيوا .. عامة انا نازلة .. هروح اوضتي وانام بقا

عماد: استني .. رايحة فين؟ .. تعالي

سالي: لا انا هنزل

عماد: يا بنتي تعالي .. انا أصلا عايز أتكلم معاكي

سالي: خير .. فيه حاجة؟

عماد: ممكن اسألك سؤال وبلاش الدبش اللي انتي بتحدفيه دايما ده؟

سالي: استر يا رب .. اتفضل اسأل

عماد: انتي قصيتي شعرك ليه؟

سالي: عشان انا أصلا ما بحبش أطول شعري

عماد: اه

سالي: طالما سألت .. انا كمان عايزة اسألك سؤال

عماد: طبعا

سالي: انت ايه اللي يهمك في شعري يعني؟

عماد: يخرب بيت أبو كده .. انتي ما بتعرفيش تقعدي دقيقة من غير ما تخبطي في اللي قدامك؟ .. اهو مجرد سؤال .. يا ساتر .. ده انتي فظيعة ومستفزة

سالي (وهي بتضحك): مانا عارفة

في نفس اللحظة دي دخلوا باقي الشلة ..

(حوار بالانجليزي)

اميلي: انتوا هنا واحنا بندور عليكم؟

علا: بقول لكم ايه؟ ما تيجوا نحتفل احنا هنا .. بدل الدوشة اللي تحت دي؟

كلهم في صوت واحد قالوا ماشي وموافقين وهيييييييييييييه .. وعلا طلبت من سالي تنزل معاها تجيب اكل من وعصاير من الحفلة اللي تحت

**

علا: انتوا كنتوا بتعملوا ايه فوق؟

سالي: ولا حاجة .. يعني كنا هنعمل ايه؟

علا: متأكدة؟

سالي: انا طلعت لقيته ... واتكلمنا شوية وخلاص

علا: اتكلمتوا؟

سالي: اه .. اتكلمنا

علا: اكيد فتحتوا لبعض القديم والجديد

سالي: لا خالص .. هو كان بيسألني عن حالي في الجامعة من ساعة ما جيت

علا: بس؟

سالي: اه بس

**

بعد ما طلعوا البنتين للسطوح بدأ الشلة كلها يرقصوا وياكلوا ويهيصوا ويضحكوا .. وبعد حوالي ساعة المزيكا اللي تحت بدأت تهدى وبدأوا يقوموا عشان ينزلوا اوضهم .. ما عدا علا وعماد اللي فضلوا قاعدين ع السطوح

علا: كنتوا بتتكلموا فيه قبل ما نيجي؟

عماد: عادي يعني .. كنت بسألها عاملة ايه هنا؟

علا: بقول لك ايه؟ .. مالكش دعوة بيها

عماد: يعني ايه ماليش دعوة بمين؟

علا: انا قلت لك وخلاص .. مالكش دعوة بيها .. ومفيش داعي كمان تحكي لها على اللي كان بيننا قبل كده

عماد بص لها بصة غريبة قوي وسابها ونزل .. وهي فضلت قاعدة متضايقة وعمالة تنفخ

**

بعد يومين الدراسة بدأت والكل صحي بدري وبدأوا يجهزوا عشان يروحوا المحاضرات .. الشلة كلها نزلت عشان يفطروا ويروحوا الجامعة سوا .. طول السكة سالي ماشية  تتنطط وتجري هي وراهول وأنور واميلي وعلا .. وتاتلي ماشية جنب عماد وهي مش طايقة نفسها

(حوار بالانجليزي)

عماد: مالك؟

تاتلي: مفيش

عماد: مفيش ازاي؟ .. ده انتي شكلك متضايقة جدا

تاتلي: شوف أنور بيعمل ايه؟

عماد: ماله يعني؟

تاتلي: ماله ازاي؟ .. مش شايف بيعمل ايه؟

عماد: بيعمل ايه يعني؟

تاتلي: الجري والتنطيط اللي بيعمله ده

عماد: طب ما تجري وتتنططي معاه انتي كمان .. ايه المشكلة؟

وراح شاددها من ايدها غصب عنها وطلعوا يجروا مع باقي الشلة

**

في البريك تاتلي وأنور اتقابلوا

(حوار بالتركي)

أنور: ازيك؟ .. وحشتيني

تاتلي (من تحت ضرسها): كويسة

أنور: يا ساتر .. كويسة ازاي؟ .. ده انتي عينك بتطلع شرار زي التنين

تاتلي: ايه اللي كنت بتعمله النهاردة الصبح ده؟

أنور: كنت بعمل ايه؟

تاتلي: الجري اللي كان في الشارع ده؟

أنور: طب مانتي طلعتي تجري معانا

تاتلي: ده بعد ما عماد شدني .. لكن بصراحة ما كانش عاجبني تصرفك ده ابدا

أنور: ايه يابنتي؟ ما تفكيها كده وافرحي وانبسطي .. احنا هنقعد هنا سنة بحالها .. مش هنقعد مكشرين .. وبعدين ده انا كنت عازمك على العشا النهاردة

تاتلي: بجد؟

أنور: اه بجد طبعا

تاتلي (وهي بتبتسم): ماشي .. موافقة

**

بعد ما اليوم خلص .. سالي كانت قاعدة بتعمل شغل فريلانس على اللاب بتاعها وعلا كانت قاعدة بتذاكر... سالي حست بالجوع بس الوقت كان متأخر بعد معاد العشا في مطعم السكن .. راحت لماكينة الحلويات اللي في الدور بتاعها .. لقت الماكينة مش شغالة .. قالت تطلع الدور اللي فوق عشان تاخد من الماكينة اللي هناك .. وبالصدفة كان راهول وعماد خارجين من اوضتهم

(حوار بالانجليزي)

عماد: انتي جعتي ولا ايه؟

سالي: اه جدا

عماد: تعالي معانا .. احنا هنوريكي حاجة

سالي: حاجة ايه؟

**

نزل راهول وعماد وسالي في اتجاه المطعم

(حوار بالانجليزي)

سالي: المطعم قافل .. رايحين فين انتوا؟

عماد: شششششش .. تعالي معانا بس

التلاتة اتسحبوا ودخلوا المطبخ وولعوا النور

(حوار بالانجليزي)

راهول: ها؟ ايه رأيك؟

سالي: رأيي في ايه؟

راهول: في المكان .. ماحنا هناكل

سالي: هناكل ايه؟ احنا هنتمسك هنا

عماد: لا متخافيش .. تعالي

فتح عماد التلاجة وسالي واقفة جنبه

عماد: تحبي تاكلي ايه؟

سالي: يا ريجيم اللي باظ ياما

عماد: ايه؟

سالي: ايه كل الاكل ده؟

سالي اول ما شافت البروكلي اتجننت وعينها لمعت

عماد: بتخططي لايه يا مصيبة انتي؟ مانا عارفك

سالي: تحب تجرب اكلة جديدة؟

عماد: بروكلي لا .. انتي عارفة اني مش بحبه

سالي: لا .. انا هخليك تحبه .. خد اغسل ده انت وراهول

**

في نفس الوقت اميلي كانت في اوضتها بتحضر نفسها للنوم بعد شوية الباب خبط .. اتاريها علا كانت خلصت مذاكرة

(حوار بالانجليزي)

علا: هي سالي هنا؟

اميلي: لا .. تعالي ادخلي

دخلت علا الاوضة

علا: ايه ده؟ هي تاتلي فين؟

اميلي: خرجت مع أنور يا ستي

وهم بيتكلموا الباب فتح وطلعت تاتلي

**

في المطبخ بقا الباب فتح فجأة وكانوا التلاتة (راهول وعماد وسالي) بياكلوا وبيتكلموا:

(حوار بالانجليزي)

راهول: بصراحة انا مش عارف أقول لعلا ازاي اني معجب بيها؟

سالي: على فكرة .. البنات ما بيحبوش الولد اللي بيخاف ولا المتردد .. البنات بتحب الولد الجريء

في اللحظة دي عماد كان بيبص لسالي ومركز معاها قوي ومش حاسس بحاجة حواليه .. وفي اللحظة دي سمعوا صوت الباب بيفتح

سالي (بالعربي): يالهوي .. الاطباق

راهول (بالانجليزي): ايه؟

عماد (بالانجليزي): الطبق

وجريوا استخبوا ورا دولاب من دواليب الخزين وهم سامعين خطوات بتقرب .. بتقرب .. بتقرب وفجأة سمعوا صوت

(حوار بالانجليزي)

( ): بتعملوا ايه؟

كلهم اتفزعوا طبعا .. وطلع اللي دخل عليهم هم أنور .. وكلهم فضلوا يضحكوا على اللي حصل ده

أنور: بتاكلوا من غيري؟

راهول: مانت كنت في معاد غرامي ومحدش كلمك

عماد وسالي: ووهوو

أنور: وانتوا بتاكلوا ايه؟

عماد: نودلز بالبروكلي .. حلوة قوي

سالي بصت لعماد وهي مذهولة

أنور قعد مع عماد وراهول وسالي وفضلوا يتكلموا

(حوار بالانجليزي)

أنور: وانت ناوي تقول لها امتى؟

راهول: مش عارف

سالي: قلت لك قبل كده .. خليك واثق من نفسك

عماد: وانت أصلا ايه اللي شادك فيها كده قوي؟ انت أصلا ما لحقتش تعرفها

أنور: فعلا .. انا رأيي تستنى شوية وبعدين تقول لها

**

بعد كام يوم في البريك اللي في وسط الدراسي تاتلي وعماد كانوا قاعدين بيتغدوا في الكافيتريا ومستنيين باقي الشلة ..

(حوار بالانجليزي)

تاتلي: هو انت تعرف سالي من زمان؟

عماد: اه .. من كام سنة كده

تاتلي: يااااه .. انتوا أصحاب قوي بقا على كده

عماد: يعني .. بتسألي ليه؟

تاتلي: بصراحة انا حاسة ان فيه حاجة بينها وبين أنور

عماد: أنور مين؟ أنور خطيبك؟

تاتلي: اه أنور خطيبي

عماد: ما اعتقدش .. اكيد لا

**

بعد ما خلص اليوم الدراسي قرر الاصحاب يخرجوا يتمشوا في الشارع ... 

https://www.facebook.com/Batteekh.Season
https://www.facebook.com/sarahsadek2020