حوالي أسبوعين عدوا
طول الأسبوعين سالي حاولت تشغل نفسها
بالشغل والمذاكرة والفرقة لانها ما كانتش عايزة تفكر.. وكعادتها كانت مركزة جدا اكتر
من الأوقات العادية .. تسلم الشغل بدري جدا عن مواعيده .. تجيب درجات عالية جدا ..
تعمل بروفات حلوة جدا.. هي دايما بتعمل كده في المواقف الصعبة .. بتهرب منها
بالتركيز في الشغل والدراسة .. بس كل ده ما كانتش تعرف اللي علا عملته وكمان ما
قالتش لعماد على اللي حصل
طول الأسبوعين تاتلي بتحاول تتجنب أنور
طول الأسبوعين أنور متضايق وعصبي وسايب
دقنه وهو كمان كان واخد جنب
طول الأسبوعين علا كل يوم بعد المحاضرات
بتخرج مع روهان .. اللي كان هيطير من السعادة
طول الأسبوعين ولان علا مش في الاوضة كانت
سالي تشغل المزيكا وهي بتذاكر وتسيب الباب مفتوح .. وكل يوم عماد يقف جنب باب
الاوضة ويتفرج عليها وهي مشغولة .. واحيانا يدخل ويقعد يذاكر معاها واحيانا يمشي
من غير ما هي تشوفه
لكن الوحيدة اللي كانت مبسوطة جدا طول
الأسبوعين دول هي اميلي لانها خلاص نقلت حاجتها في الشقة اللي هي وجاك اجروها عشان
يعيشوا فيها .. رغم انها كانت هتتجنن انهم ليه مش بيتجمعوا في الغدا زي عادتهم ..
عشان كده قررت انها تتكلم مع تاتلي .. لانها اقرب واحدة ليها بحكم انها كانت عايشة
معاها في الاوضة فعزمتها عندها في الشقة بعد الجامعة
(حوار بالانجليزي)
اميلي: ايه رأيك في الشقة بقا؟
تاتلي: حلوة .. مبروك
اميلي: شكلك حزين قوي .. مالك؟
تاتلي: علا قالت لي ان أنور قال لسالي انه
بيحبها
اميلي: ايه؟ .. وانتي هتعملي ايه؟
تاتلي: مش عارفة
اميلي: انتي كلمتي أنور؟
تاتلي: لا
اميلي: طب كلمتي علا او عماد؟
تاتلي: لا .. انا هتجنن وبجد مش عارفة
اعمل ايه
تاتلي بدأت تعيط واميلي خدتها في حضنها
وقعدت تطبطب عليها
***
في نفس الوقت علا كانت خارجة مع روهان ..
وعشان كده كان عماد قاعد مع سالي في الأوضة بيتفرجوا على فيلم .. كانوا قاعدين على
الأرض ومشغلين الفيلم على اللاب بتاع سالي .. ولما سقعوا شوية اتغطوا بالبطانية
بتاعت سالي .. سالي حطت راسها على كتف عماد .. وبعد شوية الاتنين راحوا في النوم
...
بعد حوالي ساعتين علا رجعت .. فتحت الباب
بالراحة عشان يمكن سالي تكون نايمة .. بس دخلت وشافتهم فخرجت تاني بالراحة برضه
عشان ما يصحوش وعشان هي كمان اتضايقت .. وده اللي خلاها طلعت لتاتلي تاني
***
تاني يوم ساعة الغدا أنور طلب من سالي انه
يتغدى معاها بره الجامعة .. وهي وافقت على مضض
(حوار بالتركي)
سالي: يا ترى كنت عايز تكلمني في ايه؟ ..
ايه الموضوع المهم قوي كده؟
أنور: عماد
سالي: ماله؟
أنور: انتوا فيه بينكم حاجة اليومين دول؟
سالي: لأ طبعا .. انت بتقول ايه؟
أنور: اومال رفضتيني ليه لما قولت لك اني
بحبك؟
سالي: قلت لك احنا اخوات وما ينفعش .. انت
مش مصدقني ليه؟
أنور: متأكدة؟
سالي: متأكدة طبعا
طبعا سالي اتصدمت لانها مش ما كانتش حكت
لحد على حاجة .. يبقا أنور عرف منين؟ ...
سالي: وبعدين انت ناسي انك خاطب؟ .. المرة
اللي فاتت انا سبتك ومشيت .. بس انت ...
أنور (وهو بيقاطعها): أنا هسيب تاتلي
سالي (وهي مذهولة): ايه؟
أنور: المفروض اننا في بريك .. بس انا مش
ناوي اكمل .. انتي عارفة انا وهي مختلفين ازاي .. وعارفة انا وانتي متشابهين ازاي
.. انتي غيرها خالص .. عشان كده انا بحبك
سالي: انت ليه مش قادر تفهم انه مش هينفع؟
وسابته ومشيت
***
بالليل بعد معاد العشا ما خلص بحوالي ساعة
.. سالي بعتت لعماد رسالة على الواتساب
سالي: "تعالى ع المطبخ حالا"
***
بعد شوية عماد نزل لها ..
عماد: وحشتيني
سالي: وانت كمان
عماد: مالك؟ ايه الموضوع المهم اللي انتي
عايزاني فيه؟
سالي: أنور عرف اللي بيننا .. ومش عارفة
جاب الكلام ده منين؟
عماد: ايه؟ .. طب ايه العمل دلوقتي؟
سالي: مش عارفة
طبعا سالي ما كانتش عايزة عماد يعرف اللي
حصل ما بينها وبين أنور عشان كده ما حكتلوش وكمان كانت مش عايزة أنور يعرف اللي
بينها وبين عماد .. لانها كانت حاسة الاتنين لو عرفوا هتحصل كارثة .. وعماد كان
خايف من تصرفات علا .. عشان كده سالي وعماد قرروا ما يتقابلوش الفترة الجاية ..
على الأقل لحد الامتحانات ما تخلص .. يعني بعد حوالي شهرين
***
وعدوا الشهرين بسرعة وخلصت الامتحانات ..
واميلي عزمت الشلة كلها في بيت ابوها وامها تاني عشان يقضوا أجازة الربيع اللي
مدتها أسبوع
***
المرة دي كان فيه ناس ناقصة عن المرة اللي
فاتت .. عايشة ما جاتش من الهند .. وتاتلي قررت تأجر استوديو صغير جنب الجامعة وما
راحتش معاهم
***
بعد العشا وبعد ما الكل ناموا سالي خرجت
الجنينة .. وعماد حصلها بعد كام دقيقة .. وخدها وراحوا يتمشوا .. وعلا كانت واقفة
في الشباك فوق شايفاهم وهتموت من الغيظ
عماد: يااااااااااه .. تعرفي انك وحشتيني
جدا؟
سالي: وانت قوي
عماد: انا كنت هتجنن طول المدة دي
سالي: وانت لسة ما اتجننتش؟ .. ده كفاية
انك بتحب كائنة زيي .. دي لوحدها تثبت انك مش طبيعي
سالي وعماد مشيوا مسافة طويلة جدا لحد ما
وصلوا لبيت مهجور ومكسر .. عماد بص من الشباك لقا المنظر صعب وكمية تراب فظيعة ..
بس سالي بصت في الجراج ولقت كنبة قديمة وعليها لحاف قديم فندهت لعماد ..
الاتنين قعدوا ع الكنبة وفضلوا يرغوا لحد
ما ناموا ..
***
أول ما الشمس طلعت سالي صحيت وصحت عماد ..
ورجعوا على بيت اميلي .. ولما وصلوا كانوا لسة كل اللي في البيت نايمين .. ماعدة
والدة اميلي اللي اول ما شافتهم ابتسمت .. عماد سابهم ونزل على اوضة الغسيل وهو
مكسوف قوي .. لكن سالي قعدت من والدة اميلي في المطبخ
(حوار بالانجليزي)
والدة اميلي: مبروك
سالي (وهي بتبسم): شكرا .. بس ارجوكي يا
طنط .. انا مش عايزة حد يعرف
والدة اميلي: ليه؟
سالي حكت لها على كل حاجة حصلت من ساعة
الاجازة اللي فاتت لحد اللحظة دي
***
تاني يوم بالليل الناس كلها كانت متجمعة ع
العشا .. والمرة دي أنور شرب كتير جدا .. وحصلت مفاجأة .. جاك طلع خاتم الماظ وركع
قدام اميلي وطلب ايدها للجواز وهي وافقت .. وكلهم باركوا لها وحضنوها .. واميلي
طلبت من سالي تزغرد.. وفعلا سالي زغردت .. طبعا في اللحظة دي سالي وعماد كانوا
بيبصوا لبعض بصة معناها بيقول "عقبالنا" .. أنور اخد باله وخرج قعد في
الجنينة
***
في نفس اللحظة كان سالي وعماد واقفين
بيغسلوا مواعين العشا ومبسوطين وبيضحكوا .. علا كانت واقفة تتفرج عليهم وهي على
آخرها وبعد شوية خرجت قعدت مع أنور .. على غير العادة
(حوار بالانجليزي)
علا: مالك؟
أنور: مفيش
علا: بس أنا عارفة مالك
أنور: عارفة ايه؟
علا: عارفة انك بتحب سالي .. وعارفة ان
سالي بتحب عماد
أنور: ما هي قالت لي انهم كانوا بيحبوا
بعض زمان
علا: ده على أساس انك ما تعرفش اللي بينهم
دلوقتي؟
أنور: انتي عرفتي منين؟
علا بدأت تحكي لأنور .. بس بطريقة نص
الحقيقة .. وألفت قصص وحوارات غير اللي شافته تماما ...
***
بعد شوية جاك واميلي خرجوا عشان يحتفلوا
بخطوبتهم لوحدهم .. وسالي راحت اوضة الغسيل عشان تغسل هدومها .. بعد شوية أنور دخل
لها
(حوار بالتركي)
أنور: عقبالك
سالي: وعقبالك انت وتاتلي لما ربنا يهديكم
كده وترجعوا لبعض
وفي اللحظة دي دخلت والدة اميلي .. وأنور ارتبك
وخرج
(حوار بالانجليزي)
والدة اميلي: انا لقيته دخل لك قلت الحقه
قبل ما يضايقك .. انا لاحظت انه شرب كتير
سالي: لا هو مؤدب .. ما اعتقدش هيعمل حاجة
والدة اميلي: عامة لو حصلت حاجة ضايقتك
قولي لي
سالي: اكيد هقول لك يا طنط
والدة اميلي اخدت سالي بالحضن
***
في نفس اللحظة علا كانت لسة قاعدة في
الجنينة وروهان خرج قعد معاها
(حوار بالانجليزي)
روهان: عقبالنا
علا سهمت وبصت في الأرض
روهان: مالك يا علا؟ انتي غريبة اليومين
دول .. بتقربي مني وفي نفس الوقت مش عايزة نتخطب .. انا مش قادر افهمك
علا: انا زي ما قلت لك قبل كده .. محتاجة
وقت افكر .. عشان كده قررت اقرب منك عشان افهمك اكتر.. واعتقد دي حاجة تبسطك
روهان: اكيد طبعا .. بس انا نفسي نرتبط
وتبقا علاقتنا رسمية .. نفسي تبقي حلالي
علا: ممكن بلاش زن في الموضوع ده؟ .. انا
لما احس اني اخدت قرار اكيد هبلغك
روهان: طب خلاص مش هتكلم تاني في الموضوع
ده .. بس ياريت اسمع ردك قريب
علا: ماشي
روهان: خلاص اضحكي بقا .. ولا عايزاني
ازغزغك؟
***
تاني يوم الصبح سالي كانت نايمة في اوضة
اميلي مع البنات .. وصحيت على صوت علا
علا: سالي اصحي .. عمو تعب وطلبنا له الإسعاف
سالي: ايه؟
https://www.facebook.com/Batteekh.Season
https://www.facebook.com/sarahsadek2020
https://www.facebook.com/sarahsadek2020
ليست هناك تعليقات:
إرسال تعليق